তেজপুৰ,৭ এপ্ৰিল: শোণিতপুৰ জিলাৰ তেজপুৰ চহৰৰ এক্স পুলিচ লাইনৰ এগৰাকী চিত্ৰকাৰে লাভ কৰিলে ইণ্ডিয়া বুক অব ৰেকৰ্ডৰ খিতাপ । এই খিতাপ অৰ্জন কৰিছে ৰোনাল ৰাজবংশী নামৰ চিত্ৰকাৰ গৰাকীয়ে ৷ তেওঁ বিভিন্ন সৰু-বৰ ছবি অংকন কৰাৰ লগতে নদীৰ শিলত জীৱ-জন্তুৰ চিত্ৰ অংকন কৰে ৷
ইয়াৰ উপৰিও বিভিন্ন বৰেণ্য ব্যক্তিৰ চিত্ৰ শিলত অংকন কৰি এই খিতাপ অৰ্জন কৰে যুৱকগৰাকীয়ে । যোৱা মাহৰ ২০ ফেব্ৰুৱাৰীত ইণ্ডিয়া বুক অব ৰেকৰ্ডৰ তৰফৰ পৰা এই বিষয়ে অৱগত কৰি খিতাপ প্ৰদান কৰা হয় । সৰুৰে পৰা ছবি আঁকি ভালপোৱা ৰোনাল বৰ্তমান এগৰাকী চিত্ৰ শিক্ষক ।
উল্লেখ্য যে, বৰেণ্য ব্যক্তি মহাপুৰুষ শ্ৰীমন্ত শংকৰদেৱ, লোকপ্ৰিয় গোপীনাথ বৰদলৈ, কলাগুৰু বিষ্ণুপ্ৰসাদ ৰাভা, ৰূপকোঁৱৰ জ্যোতিপ্ৰসাদ আগৰৱালা, নটসূৰ্য ফণী শৰ্মাৰ চিত্ৰ অংকন কৰি এই খিতাপ লাভ কৰিছে ৰোনালে । ইতিমধ্যে ইণ্ডিয়া বুক অব ৰেকৰ্ডৰ তৰফৰ পৰা ৰোনাললৈ পত্ৰ প্ৰেৰণ কৰা হৈছে ।
লগতে পঢ়ক: আমগুৰিত ব’হাগীক আদৰাৰ ব্যাপক প্ৰস্তুতি
