শিৱসাগৰ, 24 আগষ্ট : বিশ্বৰ সকলোতকৈ উচ্চতম শৃংগ এভাৰেষ্ট শৃংগ । সাগৰপৃষ্ঠৰ পৰা ইয়াৰ উচ্চতা 8848 মিটাৰ । এই শৃংগত আৰোহণ কৰা অসম সন্তান নৱ ফুকনৰ শিৱসাগৰত সংবাদ মেল । শিৱসাগৰ জিলাৰ চেপন শান্তিবন পথৰ নিৱাসী গদেশ্বৰ ফুকন আৰু ভোগেশ্বৰী ফুকনৰ পুত্ৰ নৱ ফুকনে 2016 বর্ষত মাউন্ট এভাৰেষ্ট শৃংগ বিজয়ীসকলৰ মাজত নিজৰ নাম সন্নিৱিষ্ট কৰিবলৈ সক্ষম হৈছিল ।
14 জনীয়া এটা পর্বতাৰোহী দলৰ দলপতি হিচাপে যোগদান কৰি সম্পূৰ্ণ 46 দিনৰ অন্তত নৱ ফুকনে এভাৰেষ্ট শৃংগত গৈ থিয় হ'বলৈ সক্ষম হৈছিল । এই 14 জনীয়া দলটোত ভাৰতৰ লগতে দেশৰ বাহিৰৰ যেনে চীন,কানাডা,ইৰাণ,পেৰু আৰু কোৰিয়াৰ পর্তাৰোহীয়েও অংশগ্ৰহণ কৰিছিল ।
কিন্তু, আর্চয্যজনক কথা যে, এই 14 জনীয়া দলৰ তালিকাত থকা শেষৰ ব্যক্তিজনক টেঞ্জিং নৰ্গে দুঃসাহসী বঁটা 2019ৰ বাবে মনোনীত কৰাক লৈ এতিয়া এক আজৱ ঘটনা পোহৰলৈ আনিছে এভাৰেষ্ট বিজয়ী নৱ ফুকনে । উল্লেখ যে,হাৰিয়ানাৰ নৰেন্দ্ৰ সিঙ নামৰ ব্যক্তিজনলৈ আগবঢ়োৱা এই বঁটাৰ বাবে তেখেত প্রকৃতার্থত যোগ্য নহয় বুলি দাবী উত্থাপন কৰিছে নৱ ফুকনে ।
অহা 29 আগষ্টত ৰাষ্ট্রীয় ক্রীড়া দিৱসত দেশৰ ৰাষ্ট্রপতি মহোদয়ৰ পৰা বঁটা লাভ কৰিবলৈ সাজু হোৱা নৰেন্দ্র সিঙে সম্পূৰ্ণ মিছা ফটো আৰু মিছা তথ্যৰে এনে সন্মানীয় বঁটা লাভ কৰিবলৈ ওলাইছে । যিহেতু, 2016 বর্ষত নৱ ফুকনৰ দ'লত আছিল নৰেন্দ্ৰ সিঙ,যিজনে অক্সিজেনৰ অভাৱত অসুস্থ হৈ পৰাত গন্তব্য স্থানৰ পৰা বহু হাজাৰ ফুট নিলগতে যাত্ৰা সামৰিছিল । 2016 বর্ষত তেওঁলোকে পৰিধান কৰিছিল ৰঙা ৰঙৰ পোছাক,আনহাতে লেপাৰ এখন বাতৰি কাকতত নৰেন্দ্ৰ সিঙে সেউজীয়া ৰঙৰ পোছাক পৰিধান কৰি থকা ফটো প্রকাশ পাইছে । এনে পৰিস্থিতিত এনে বিষয়ক চৰকাৰে গুৰুত্ব সহকাৰে লৈ উচিত তদন্ত কৰাৰ লগতে যোগ্যজনক বঁটা প্ৰদান কৰি নৰেন্দ্ৰ সিঙৰ দৰে ভুৱা ব্যক্তিক এনে স্বীকৃতি দিয়াৰ পৰা বিৰত থাকিবলৈ আহ্বান জনাইছে ।
লগতে পঢ়কঃ ভ্ৰাম্যমানৰ মঞ্চ কঁপাবলৈ আকৌ উভতি নাহে জীৱেশ্বৰ ডেকা
