শিৱসাগৰ, 15 ছেপ্টেম্বৰ: পুনৰ প্ৰতিবাদত উত্তাল শিৱসাগৰ । কেন্দ্ৰীয় চৰকাৰৰ জনজাতিকৰণৰ সিদ্ধান্তক লৈ বৃহস্পতিবাৰে পুৱাৰে পৰা উত্তপ্ত হৈ পৰিছে শিৱসাগৰ নগৰৰ ৰাজপথ । টাই আহোমকে ধৰি মটক জনগোষ্ঠীক জনজাতিৰ মৰ্যদা প্ৰদান নকৰাক লৈ সৰৱ হৈ পৰিছে জিলাখনৰ জনগোষ্ঠীয় সংগঠনসমূহ । যাৰবাবে পুৱা টাই আহোম ছাত্ৰ সন্থাৰ পাছত এইবাৰ পুনৰ প্ৰধানমন্ত্ৰী আৰু মুখ্যমন্ত্ৰীৰ প্ৰতিমূৰ্তি দাহ কৰে শিৱসাগৰ জিলা মটক ছাত্ৰ সন্থা আৰু টাই আহোম যুৱ পৰিষদে ।
আহোম জনগোষ্ঠীৰ লগতে মটক জনগোষ্ঠীক কেন্দ্ৰীয় চৰকাৰে বুধবাৰে অনুষ্ঠিত কেবিনেটত জনজাতিৰ মৰ্যদা প্ৰদান নকৰাকলৈ আজি দুয়োটা সংগঠনে পৃথকে পৃথকে প্ৰতিবাদ সাব্যস্ত কৰে । শিৱসাগৰ নগৰৰ দ'লমুখ চাৰিআলিত টাইপাই প্ৰধানমন্ত্ৰী নৰেন্দ্ৰ মোদীৰ প্ৰতিকৃৰ্তি দাহ কৰি উত্তাল প্ৰতিবাদ সাব্যস্ত কৰে ৷ একেদৰে শিৱসাগৰৰ প্ৰগতি চাৰিআলিত মটক ছাত্ৰ সন্থাই প্ৰধানমন্ত্ৰী নৰেন্দ্ৰ মোডী, জনজাতি পৰিক্ৰমা মন্ত্ৰী অৰ্জুন মুণ্ডা আৰু মুখ্যমন্ত্ৰী হিমন্ত বিশ্ব শৰ্মাৰ প্ৰতিকৃৰ্তি দাহ কৰে ।
সংগঠনদ্বয়ে অনাগত সময়ত বিজেপি চৰকাৰে তেওঁলোকৰ কৰ্মফল ভুগিব লাগিব বুলি সকিয়াই দিয়ে ।
উল্লেখ্য যে, প্ৰধানমন্ত্ৰী নৰেন্দ্ৰ মোডীৰ অধ্যক্ষতাত বুধবাৰে অনুষ্ঠিত কেন্দ্ৰীয় কেবিনেটে (Union Cabinet led PM Modi granted ST) এক ঐতিহাসিক সিদ্ধান্ত গ্ৰহণ কৰে ৷ কেন্দ্ৰীয় কেবিনেটে ছত্তিশগড়, হিমাচল প্ৰদেশ, কৰ্ণাটক, তামিলনাডু আৰু উত্তৰ প্ৰদেশৰ অনুসূচিত জনজাতিৰ শ্ৰেণীত কেইবাটাও জনজাতীয় সম্প্ৰদায়ক অন্তৰ্ভুক্ত কৰাৰ প্ৰস্তাৱত অনুমোদন জনায় (Union Cabinet approved 5 states tribes as ST) ।
কিন্তু ইয়াৰ বিপৰীতে বিগত বহুবছৰৰ পৰা জনজাতি মৰ্যদাৰ বাবে দাবী উত্থাপন কৰি অহা অসমৰ আহোম, মটক জনগোষ্ঠীসহ ছয় জনগোষ্ঠীৰ জনজাতিকৰণ(6 tribes demanding ST in Assam) আজি পৰ্যন্ত নহ’ল ৷ যাৰবাবে কেন্দ্ৰীয় আৰু ৰাজ্য চৰকাৰৰ বিৰুদ্ধে সোচ্চাৰ হৈ পৰে শিৱসাগৰৰ বিভিন্ন জনগোষ্ঠীয় সংগঠনসমূহ ৷ তেওঁলোকে কেন্দ্ৰীয় কেবিনেটৰ এই সিদ্ধান্তৰ বিৰুদ্ধে জিলাখনত উত্তাল প্ৰতিবাদ সাব্যস্ত কৰি বিজেপি চৰকাৰখনক কটু ভাষাৰে সমালোচনা কৰে ৷
লগতে পঢ়ক: ST status for Tribes: আকৌ বঞ্চিত হ’ল অসমৰ ছয় জনগোষ্ঠী
