শিৱসাগৰ,19 অক্টোবৰ: শিৱসাগৰত আধাৰ কেন্দ্ৰ প্ৰদানৰ নামত 40 লাখ টকাৰ বিয়াগোম কেলেংকাৰী সংঘটিত হোৱাৰ অভিযোগ উঠিছে ৷ শিৱসাগৰ চহৰৰ ৰেডক্ৰছ ৰোড নিবাসী প্ৰণৱ দাস নামৰ ব্যক্তিজনৰ বিৰুদ্ধে উত্থাপিত হৈছে এই গুৰুতৰ অভিযোগ ৷
আধাৰ কেন্দ্ৰ দিয়াৰ আভুৱা ভাৰি ধন আত্মসাৎ কৰা বুলি প্ৰণৱ দাসৰ বিৰুদ্ধে ৰনজিৎ হাজৰিকা আৰু হিমাদ্ৰী চেতিয়া ফুকন নামৰ দুগৰাকী ব্যক্তিয়ে শিৱসাগৰ সদৰ আৰক্ষী থানাত এজাহাৰ দাখিল কৰিছে ৷ জিলা বিজেপি নেতাৰ সম্পৰ্কীয় হোৱাৰ সুবাদতেই অভিযুক্ত প্ৰণৱ দাসে ধন উভতাই খোজাত ভুক্তভোগীক মৰণাস্ত্ৰ দেখুৱাই হত্যাৰ ভাবুকি দিয়া বুলি জনাইছে অভিযোগকাৰীয়ে ৷ শিৱসাগৰ সদৰ আৰক্ষী থানাত ১০৩৭/ ১৯ নম্বৰত ভাৰতীয় দণ্ডবিধি আইনৰ ৪০৬/৪২০/ ৫০৬ জামিনবিহীন ধাৰাত ব্যক্তিজনৰ বিৰুদ্ধে গোচৰ ৰুজু হোৱাৰ পাচতো আৰক্ষীৰ ফালৰ পৰা কোনো ব্যৱস্থা হাতত লোৱা হোৱা নাই ৷
উল্লেখযোগ্য যে,সংবাদ সংগ্ৰহৰ বাবে অভিযুক্ত প্ৰণৱ দাসৰ বাসগৃহলৈ যোৱাত তেওঁৰ পত্নীয়ে সাংবাদিককো এছ পি / এ এছ পিৰ নামত ভাবুকি দিয়াৰ চেষ্টা কৰা বুলি জানিব পৰা গৈছে ৷
