শিৱসাগৰ, 9 ছেপ্টেম্বৰ : বুধবাৰে যোৰহাট জিলাৰ নিমাতীঘাটত সংঘটিত ভয়াৱহ নাও দুৰ্ঘটনাৰ পাছতো চকু মেল খোৱা নাই আভ্যন্তৰীণ জল পৰিবহণ বিভাগৰ । এই ঘটনাৰ পৰা বিভাগটোৱে লোৱা নাই কোনো শিক্ষা । শিৱসাগৰ জিলাৰ দিচাংমুখস্থিত আভ্যন্তৰীণ জল পৰিবহণ বিভাগৰ কাৰ্যালয়ৰ নমুনা দেখিলে গম পোৱা যায় প্ৰকৃততে কিদৰে চলি আছে এই বিভাগ । বিভাগৰ জৰাজীৰ্ণ কাৰ্যালয়ৰ দৰে থৰক-বৰক অৱস্থা বিভাগীয় কৰ্মচাৰীৰ ।
শিৱসাগৰ জিলাৰ দিচাংমুখস্থিত আভ্যন্তৰীণ জল পৰিবহণ বিভাগৰ কাৰ্যালয়ৰ লগতে বিভাগৰ তত্বাৱধানত চলি থকা ফেৰীৰ অৱস্থা দেখিলে স্পষ্ট হৈ পৰে বিভাগৰ ফোঁপোলা স্বৰূপ । আভ্যন্তৰীণ জল পৰিবহন বিভাগৰ এইটো কাৰ্যালয়ত নিয়োজিত হৈ আছে মুঠ ৭৩ গৰাকী কৰ্মচাৰী । ইয়াৰ ৪৬ গৰাকী স্থায়ী কৰ্মচাৰী হোৱাৰ বিপৰীতে ২৭ গৰাকী মাষ্টাৰ ৰোলৰ কৰ্মচাৰী নিয়োগ হৈ আছে এই কাৰ্যালয়ত ।
লগতে পঢ়ক : নৱেম্বৰৰ পৰা আৰম্ভ হ’ব মাজুলীৰ দলং নিৰ্মাণৰ কাম !
এই সমূহ কৰ্মচাৰীৰ বাবে অসম চৰকাৰে প্ৰতি মাহে দৰমহাৰ বাবদ ব্যয় কৰি আহিছে প্ৰায় ৩০ লক্ষাধিক টকা । কিন্তু চৰকাৰী ধন খাই অহা এই বিভাগৰ কৰ্মচাৰী সকলৰ কাম কি ? পুৱা ৯ বজালৈ কাৰ্যালয়ত উপস্থিত নোহোৱা এই সকল কৰ্মচাৰীৰ সৰহ সংখ্যক কাৰ্যালয়লৈ নাহে মাহ মাহ ধৰি । আনহে নালাগে বুধবাৰে সংঘটিত ভয়ংকৰ দুৰ্ঘটনাৰ পাছতো বৃহস্পতিবাৰে কাৰ্যালয়ত উপস্থিত নহ’ল এই সকলৰ সৰহ সংখ্যক কৰ্মচাৰী ।
লগতে পঢ়ক : নিমাতীঘাটৰ ট্ৰেজেডি : সহযাত্ৰীৰ প্ৰাণ বচাবলৈ গৈ সন্ধানহীন ইন্দ্ৰেশ্বৰ বৰা
এই সকল কৰ্মচাৰীৰ এটাই কাম । দিচাংমুখৰ পৰা মাতমৰা-টেকেলীফুটা ঘাটলৈ চলা ফেৰী সমূহৰ পৰ্যৱেক্ষণ আৰু সুৰক্ষা নিশ্চিত কৰা । কিন্তু এই সামান্য দায়িত্ব পালন কৰিব পৰা নাই ৭৩ গৰাকী কৰ্মচাৰী থকা এই কাৰ্যালয়ে । পুৱা ৯.৩০ বজাত দিচাংমুখৰ পৰা যোৱা ফেৰীখন পৰ্যৱেক্ষণ কৰিবলৈ উপস্থিত নহ’ল এজনো কৰ্মচাৰী ।
লগতে পঢ়ক : নিমাতীঘাটৰ শোকাৱহ ঘটনাৰ পিছত মুখ্যমন্ত্ৰীৰ গুৰুত্বপূৰ্ণ ঘোষণা
ফেৰীত নাই দৰকাৰী সুৰক্ষা সামগ্ৰী । মাত্ৰ দহটা লাইফ জেকেট লৈ চলিছে ফেৰী । চাবলৈ নাই বিভাগৰ কোনো কৰ্মচাৰী । এই সকলৰ গাফিলতিৰ বাবে সংঘটিত হ'ব পাৰে আন এক ভয়ংকৰ নাও দুৰ্ঘটনা । দিচাংমুখত আভ্যন্তৰীণ জল পৰিবহণ বিভাগৰ এখন নিজাববীয়া নাও আছে । কিন্তু বিভাগে যাত্ৰী নোহোৱাৰ আজুহাতত এই নাওখন নচলাই ।
লগতে পঢ়ক : ৰাইজ, ছাত্ৰ সমাজ আৰু আছুৰ প্ৰতিবাদত উত্তপ্ত মাজুলীৰ পৰিৱেশ: আৰক্ষীৰ লাঠী চালনা
ইয়াৰ বিপৰীতে ইতিমধ্যে এজন লেচীক দি থোৱা ফেৰীৰ চোৱাচিতা কৰে এই সকল কৰ্মচাৰীয়ে । ৭৩ গৰাকী বিষয়া-কৰ্মচাৰী থকা এইটো কাৰ্যালয়ে এখন চৰকাৰী নাও চলাবলৈ সক্ষম নহয় যদিও বছৰে বছৰে খাই আছে চৰকাৰী ধন । আনহাতে কাৰ্যালয়ত সাংবাদিক উপস্থিত হোৱাৰ পাছত এজন এজনকৈ অনুপস্থিত কৰ্মচাৰীক ফোন যোগে মাতি আনি চহী কৰোৱা হয় উপস্থিতিৰ বহীত । ঘৰৰ পৰা উধাতু খাই আহি কেমেৰাৰ সন্মুখত উপস্থিতিৰ বহীত চহী কৰিলে এই সকলে ।
লগতে পঢ়ক : The tragic ferry accident: মন্ত্ৰী চন্দ্ৰমোহন পাটোৱাৰীৰ পদত্যাগ দাবী ভূপেন বৰাৰ
দিচাংমুখৰ আভ্যন্তৰীণ জল পৰিবহণ বিভাগৰ কাৰ্যালয়টোৰ দৰে থৰক-বৰক অৱস্থা কৰ্মচাৰী সকলৰ । এই সকল কৰ্মচাৰীৰ যে কোনো কাম নাই বা কাৰ্যালয়লৈ নহাকৈ চৰকাৰী ধন খাই আছে সেই কথা স্বীকাৰ কৰে শাখা বিষয়া গৰাকীয়ে । এই কাৰ্যালয়টো আভ্যন্তৰীণ জল পৰিবহণ বিভাগৰ কৰ্মহীনতাৰ এক জলন্ত উদাহৰণ । চৰকাৰ পক্ষ তথা বিভাগীয় বৰমূৰীয়াই কৰ্ম-সংস্কৃতিৰ সংশোধন সাধন কৰিব পাৰিব নে এই বিভাগটোৰ ৷ সেয়া অৱশ্যেই লক্ষণীয় হ’ব ৷
লগতে পঢ়ক : নিমাতীঘাটত উপস্থিত হৈ কি ক’লে অখিল গগৈয়ে ?
