নগাঁও, 11 অক্টোবৰ : মুখ্যমন্ত্ৰী ড৹ হিমন্ত বিশ্ব শর্মাৰ নেতৃত্বাধীন চৰকাৰখনে দুৰ্নীতিৰ বিৰুদ্ধে যিমানেই তৎপৰতা লৈছে সিমানেই পোহৰলৈ আহিছে ন ন তথ্য । শেহতীয়াকৈ বক্ৰ পথেৰে চাকৰি লোৱা টেট শিক্ষক-শিক্ষয়িত্ৰী ওপৰত চৰকাৰখনে আৰম্ভ কৰা অভিযানত দৈনিক পোহৰলৈ আহিছে বহু ভুৱা টেট শিক্ষক-শিক্ষয়িত্ৰীৰ নাম ।
এইবাৰ ধিঙৰ এগৰাকী টেট উত্তীৰ্ণ শিক্ষয়িত্ৰীৰ বিৰুদ্ধে উত্থাপিত হৈছে ভুৱা প্ৰমাণপত্ৰৰে চাকৰি লোৱা গুৰুতৰ অভিযোগ । সম্প্ৰতি নগাঁও জিলাৰ ধিঙৰ ৰুন্তী দাস নামৰ মহিলাগৰাকী কৰিমগঞ্জ জিলাৰ পাথাৰকান্দি শিক্ষাখণ্ডৰ অন্তৰ্গত ৯২৯ নং মোলিকান্দি প্ৰাথমিক বিদ্যালয়ত কৰ্মৰত হৈ আছে ৷
কায়স্থ সম্প্ৰদায়ৰ সাধাৰণ শ্ৰেণীৰ ৰুন্তী দাসে অনুসূচিত জাতিৰ ভুৱা প্ৰমাণপত্ৰ ব্যৱহাৰ কৰি দীৰ্ঘদিন ধৰি শিক্ষকতা কৰি অহাৰ অভিযোগ উত্থাপন হৈছে ।
শিক্ষয়ত্ৰীগৰাকীয়ে উক্ত চাকৰিৰ বাবে অনুসূচীত জাতি উন্নয়ন পৰিষদৰ পৰা ভুৱা জাতিগত প্ৰমাণপত্ৰ জালিয়াতিৰে উলিয়াই শিক্ষা বিভাগক বিপথে পৰিচালিত কৰাৰ অভিযোগ তুলিছে অনুসূচিত জাতি সংগ্ৰামী যুৱ পৰিষদে ।
পৰিষদে উল্লেখ কৰা অনুসৰি, ধিঙত বৰ্তমানেও প্ৰায় ১২ গৰাকীকৈ শিক্ষক-শিক্ষয়িত্ৰীয়ে ভুৱা প্ৰমাণপত্ৰৰে শিক্ষা বিভাগত কৰ্মৰত হৈ আছে । তদুপৰি ধিঙৰ এখন মহাবিদ্যালয়তো এনেধৰণে জালিয়াতিৰে শিক্ষকতা কৰি থকাৰো অভিযোগ উখাপন হৈছে । ইতিমধ্যে এই বৃহৎ কেলেংকাৰীৰ বিৰুদ্ধে সমগ্ৰ অসমজুৰি তদন্ত বিচাৰি অসম চৰকাৰলৈ স্মাৰক পত্ৰও প্ৰেৰণ কৰা কথাও ব্যক্ত কৰে পৰিষদে ।
অনুসূচিত জাতি সংগ্ৰামী যুৱ পৰিষদে লগতে এই সন্দৰ্ভত নগাঁও সদৰ আৰক্ষী থানাত এজাহাৰ দাখিল কৰিছে । পৰিষদে এই ঘটনাৰ উচিত তদন্ত কৰি বিহিত ব্যৱস্থা গ্ৰহণৰ বাবে দাবী জনায় ৷
লগতে পঢ়ক : গৌৰাংটাৰীৰ হত্যাকাণ্ড : আৰক্ষীৰ জালত মূল অভিযুক্ত দুদুল চৌধুৰী
