নগাঁও, 2 মে’ : নগাঁও বন বিভাগৰ ৰহস্যজনক নীৰৱতাৰ সুযোগ লৈয়ে মধ্য অসমত অব্যাহত আছে চোৰাং কাঠৰ ৰমৰমীয়া ব্যৱসায় । কিন্তু বন বিভাগৰ নীৰৱতাৰ বিপৰীতে সষ্টম হৈ আছে নগাঁও আৰক্ষী । যাৰবাবে দেওবাৰে নিশা নগাঁও আৰক্ষীয়ে প্ৰায় ২০ লক্ষাধিক টকাৰ ম্যানমাৰৰ চোৰাং চেগুণ ভৰ্তি কাঠ জব্দ কৰিবলৈ সক্ষম হয়(Illegal wood seized at Nagaon) ।
নগাঁও আৰক্ষীয়ে দেওবাৰে নিশা অভিযান চলাই ২০ লক্ষাধিক টকাৰ চোৰাং চেগুণ কাঠ জব্দ কৰিবলৈ সক্ষম হয় । নগাঁও সদৰ আৰক্ষী থানাৰ ভাৰপ্ৰাপ্ত বিষয়া মনোজ ৰাজবংশীৰ নেতৃত্বত আৰক্ষীৰ এটা দলে নগাঁৱৰ বেবেজীয়াত অভিযান চলাই চোৰাং কাঠভৰ্তি ট্ৰাক জব্দ কৰে(Smuggled wood laden trucks seized in nagaon) ৷ আৰক্ষীয়ে ঘটনাৰ লগত জড়িত থকাৰ সন্দেহত এজন লোককো আটক কৰে ৷
ডিমাপুৰৰ পৰা কলকাতালৈ ট্ৰাকখনত সৰবৰাহ কৰা হৈছিল ম্যানমাৰৰ চেগুণ কাঠখিনি । ট্ৰাকখনত হালধি বস্তাৰ তলত লুকুৱাই নিয়া হৈছিল কাঠখিনি । আৰক্ষীৰ দলটোৱে আটক কৰে ট্ৰাকখনৰ চালক সুখদেৱ ৰামক । জব্দকৃত ট্ৰাকখনৰ নম্বৰ RJ 19 GG 8346 । চালক সুখদেৱ ৰামৰ ঘৰ ৰাজস্থানত বুলি জানিব পৰা গৈছে ।
আৰক্ষীৰ চকুত ধূলি দিয়াৰ উদ্দেশ্যৰে সৰবৰাহকাৰীয়ে হালধি বস্তাৰ মাজত ২০ লক্ষাধিক টকাৰ মূল্যৱান কাঠখিনি লুকুৱাই নিয়াৰ চেষ্টা কৰিছিল যদিও নগাঁও আৰক্ষীৰ বেহু ফালিবলৈ সক্ষম নহ’ল দলটো । এচাম দুষ্ট চক্ৰই নিতৌ ন ন কৌশল অৱলম্বন কৰি চোৰাং কাঠ সৰবৰাহৰ চেষ্টা কৰিছে যদিও প্ৰায় প্ৰত্যেকবাৰেই আৰক্ষীয়ে তেওঁলোকৰ সকলো ষড়যন্ত্ৰত পানী ঢালিবলৈ সক্ষম হৈছে ।
লগতে পঢ়ক : বন্ধনৰ পৰা ঋণ লৈ মহিলাই আৰম্ভ কৰিলে ড্ৰাগছৰ ব্যৱসায়
