বঢ়মপুৰ, 5 এপ্ৰিল : মঙলবাৰে নগাঁৱৰ কঠীয়াতলীৰ ওপৰবৰ লালুং গাঁৱৰ ৰাজহুৱা মঞ্চত গাই পালন আৰু দুগ্ধ উৎপাদনৰ ওপৰত এখন সজাগতা সভা অনুষ্ঠিত হৈ যায় । তিৱা স্বায়ত্ব পৰিষদৰ উদ্যোগত অনুষ্ঠিত হোৱা এই সজাগতা সভাখনৰ সভাপতিত্ব কৰে পৰিষদৰ অধ্যক্ষ মদন বৰদলৈয়ে (Dairy Farmers awareness programme held in Nagaon) ।
গো-পালক আৰু দুগ্ধ উৎপাদকসকলক সংগবদ্ধ কৰি প্ৰশিক্ষণ আৰু নজনা কথাসমূহ বিতংভাৱে বুজাই দিয়াৰ লক্ষ্যৰে এই সজাগতা সভাখন অনুষ্ঠিত কৰা হয় । সভাত অসমৰ দুগ্ধ উৎপাদক আৰু থলুৱা গো পালকসকলে কিদৰে দুগ্ধ উৎপাদনৰ ক্ষেত্ৰত চাহিদা বৃদ্ধি কৰি স্বাৱলম্বীতাৰ দিশত নিজকে আগবঢ়াই নিব পাৰে তাৰ ওপৰত বিতং ভাবে আলোচনা কৰা হয় ।
শতাধিক লোকে অংশ গ্ৰহণ কৰা এই সজাগতা সভাখনত বঢ়মপুৰ সমষ্টিৰ বিধায়ক জিতু গোস্বামী, অসম দুগ্ধ উন্নয়ন বিভাগৰ সঞ্চালক উৎপল শৰ্মা, অসম পশুধন উন্নয়ন বিভাগৰ ড৹ মতিউৰ ৰহমান, বেংক অফ বৰোদাৰ ৰাজ্যিক প্ৰৱন্ধক আইনিং ডিইংদহৰ লগতে বিভাগীয় বহু উচ্চপদস্থ বিষয়া উপস্থিত থাকে । ইফালে তিৱা স্বায়ত্ব পৰিষদৰ এনে প্ৰশংসনীয় পদক্ষেপক আদৰণি জনাইছে কঠীয়াতলীবাসী ৰাইজে ।
লগতে পঢ়ক: হাতৰ মুঠিত লৈ জীৱটো লৈ লাংটিংবাসীৰ দৈনন্দিন যাত্ৰা !
