নগাঁও, 22 ছেপ্টেম্বৰ: বৃহস্পতিবাৰে নগাঁৱত উপস্থিত হৈ কেইবাটাও বিষয়ত গুৰুত্বপূৰ্ণ মন্তব্য কৰে এ আই ইউ ডি এফৰ বিধায়ক কৰিম উদ্দিন বৰভূঞাই (AIUDF MLA Karimuddin Barbhuiyan)৷ বিধায়কগৰাকীৰ ভাষ্যত স্থান পালে চৰকাৰৰ উন্নয়নমূলক কাম-কাজ, নিযুক্তি প্ৰক্ৰিয়া, ভিক্টৰ দাসৰ বিতৰ্ক, বিদ্যুৎ মাচুল বৃদ্ধি, কংগ্ৰেছৰ সৈতে এ আই ইউ ডি এফৰ সংঘাত, কংগ্ৰেছ দলৰ গাড্ডাৰ, আগন্তুক লোকসভা নিৰ্বাচন আদি কেইবাটাও প্ৰসংগই (Karimuddin Barbhuiyan reacts on congress)৷
প্ৰথমেই চৰকাৰৰ কাম-কাজক লৈ প্ৰতিক্ৰিয়া ব্যক্ত কৰে কৰিমউদ্দিন বৰভূঞাই ৷ এ আই ইউ ডি এফৰ বিধায়ক গৰাকীৰ মুখত বিজেপি চৰকাৰৰ গুণ-গান শুনা যায় ৷ তেওঁ কয় যে, বৰ্তমান পুঁজি কম হ’লেও চৰকাৰে যথেষ্ট সংখ্যক উন্নয়নমূলক কাম কৰিছে ৷ বিৰোধী হ’লেও ভাল কামক ভাল বুলি ক’বই লাগিব বুলি কয় বিধায়কজনে (Karimuddin Barbhuiyan praises Assam govt) ৷
নিযুক্তি প্ৰক্ৰিয়াক লৈও সন্তুষ্টি প্ৰকাশ কৰে কৰিম উদ্দিন বৰভূঞাই ৷ তেওঁৰ মতে, সম্পূৰ্ণ স্বচ্ছভাৱেৰে হৈছে এই নিযুক্তি প্ৰক্ৰিয়া (Karimuddin Barbhuiyan on govt recruitment) ৷ ভিক্টৰ দাসৰ নিলম্বন সন্দৰ্ভত তেওঁ কয় যে, ভিক্টৰক নিলম্বনৰ দ্বাৰা চৰকাৰৰ নিজৰ ভাৱমূৰ্তি ভাল হৈছে ৷
ইফালে বৰ্ধিত বিদ্যুৎ মাচুল সন্দৰ্ভত তেওঁ কয় যে, বিধানসভাত এই বিষয়টো উত্থাপন কৰাৰ পাচতেই মুখ্যমন্ত্ৰী বিবৃতি প্ৰদান কৰি ইয়াৰ তদন্তৰ নিৰ্দেশ দিছে (Karim Uddin Barbhuyan reacts on electricity bill) ৷ বিৰোধী হৈ চৰকাৰৰ আসোঁৱাহসমূহ দাঙি ধৰাই বিৰোধীৰ কাম বুলি উল্লেখ কৰি তেওঁ লগতে কয় যে, চৰকাৰে কেতিয়াবা এই সমূহ নিৰীক্ষণ কৰে, কেতিয়াবা নকৰে ৷
লগতে পঢ়ক: Congress-AIUDF conflict: এ আই ইউ ডি এফৰ বিধায়ক কৰিমউদ্দিন বৰভূঞাক দালাল আখ্যা
আনহাতে, কংগ্ৰেছ আৰু এ আই ইউ ডি এফৰ মাজত চলি থকা যুঁজখন আকৌ এবাৰ স্পষ্ট হৈ পৰিল বৰভূঞাৰ বক্তব্যত (Congress AIUDF conflict) ৷ তেওঁ কয় যে, কংগ্ৰেছৰ সৈতে বৰ্তমান কোনো মিত্ৰতা নাই ৷ অহা লোকসভা নিৰ্বাচনত বিজেপি আৰু এ আই উ ডি এফৰ মাজতেই মূল যুঁজখন হ’ব ৷ বিজেপিৰ শ্ৰুতলিপি মতে কংগ্ৰেছে কোনো আলোচনা নকৰাকৈয়ে এ আই ইউ ডি এফৰ সৈতে মিত্ৰতা ভংগ কৰিছে (Karim Uddin Barbhuyan criticizes congress) ৷
ৰাষ্ট্ৰপতি নিৰ্বাচনৰ সময়ত হোৱা ক্ৰছ ভোটিং সন্দৰ্ভত তেওঁ কয় যে, 22 বিধায়কে বিজেপি প্ৰাৰ্থীক ভোট দিবৰ বাবে এ আই ইউ ডি এফৰ সিমান সংখ্যক বিধায়কেই নাই ৷ কংগ্ৰেছৰ 20 ৰ পৰা 22 জন বিধায়কে এন ডি এ সমৰ্থিত প্ৰাৰ্থীক ভোট দিয়া বুলি পুনৰ এবাৰ অভিযোগ কৰে বৰভূঞাই (Cross voting in president election) ৷ তেওঁ কয় যে, ৰাতি ৰাতি গাড়ী লৈ কোন মুখ্যমন্ত্ৰীৰ ঘৰলৈ যায় সেয়া অতি স্পষ্ট ৷
উল্লেখ্য যে, ৰাষ্ট্ৰপতি নিৰ্বাচনৰ ভোটগ্ৰহণৰ আগদিনাও একে কথাকেই কৈছিল কৰিম উদ্দিন বৰভূঞাই ৷ যাৰ পৰিপ্ৰেক্ষিতত তীব্ৰ বাক যুদ্ধৰ সূত্ৰপাত হৈছিল এ আই ইউ ডি এফ আৰু কংগ্ৰেছৰ নেতাসকলৰ মাজত ৷ আজিও পুনৰ একে উক্তিকেই দোঁহাৰিলে বৰভূঞাই ৷
কংগ্ৰেছৰ গাড্ডাৰৰ তালিকাৰ কথা উল্লেখ কৰি কৰিম উদ্দিন বৰভূঞাই প্ৰদেশ কংগ্ৰেছৰ সভাপতি ভূপেন বৰাক গাড্ডাৰৰ চৰ্দাৰ আখ্যা দিয়ে ৷ কংগ্ৰেছে বিজেপিৰ সৈতে যুক্ত হৈ বিজেপিৰ কাম কৰি থকা বুলি অভিযোগ তুলি তেওঁ কয় যে, বিজেপিৰ সৈতে মিলি থকাৰ বাবেই এ আই ইউ ডি এফে কংগ্ৰেছৰ সৈতে মিত্ৰতা নকৰে ৷
ইফালে আগন্তুক লোকসভা নিৰ্বাচনৰ সন্দৰ্ভত সাংবাদিকে সোধা প্ৰশ্নৰ উত্তৰত তেওঁ কয় যে, পূৰ্বৰ নিৰ্বাচনত জয়ী হোৱা আৰু দ্বিতীয় স্থানত থকা সমষ্টি কেইটাত এ আই ইউ ডি এফে নিজা প্ৰাৰ্থী দিয়াতো নিশ্চিত (Lok Sabha election 2024) ৷ বিশেষকৈ কলিয়াবৰ আৰু নগাঁও লোকসভা সমষ্টিৰ কথা উল্লেখ কৰি তেওঁ কয় যে, যোৱাবাৰৰ নিৰ্বাচনত এ আই ইউ ডি এফৰ ভোটেৰে গৌৰৱ গগৈ আৰু প্ৰদ্যুৎ বৰদলৈ বিজয়ী হৈছিল ৷ এইবাৰ দুয়োটা সমষ্টিতে নিজা প্ৰাৰ্থী প্ৰদান কৰি বিজেপিক পৰাভূত কৰিব বুলি এ আই ইউ ডি এফৰ বিধায়কগৰাকীয়ে মত প্ৰকাশ কৰে ৷
তেওঁৰ মতে, কলিয়াবৰত প্ৰায় 40 হাজাৰ আৰু নগাঁৱত প্ৰায় 35 হাজাৰ ভোটত এ আই ইউ ডি এফৰ প্ৰাৰ্থী জয়ী হ’ব ৷ দুয়োটা সমষ্টিতে বিজেপিৰ স্থিতি দুৰ্বল বুলি প্ৰকাশ কৰে বৰভূঞাই ৷
লগতে পঢ়ক: Cross Voting Issue: কৰিমুদ্দিন বৰভভূঞাৰ বিৰুদ্ধে পুনৰ আদালতৰ কাষ চাপিব দেৱব্ৰত শইকীয়া
