নগাঁও, 8 এপ্ৰিলঃ ই টি ভি ভাৰতৰ সৈতে হোৱা এক সাক্ষাৎকাৰত বহুকেইটা বিস্ফোৰক মন্তব্য কৰিলে এন পি পিৰ প্ৰাৰ্থী আব্দুল আজিজে ৷ নাগৰিকত্ব সংশোধনী বিধেয়কৰ বিৰুদ্ধে শক্তিশালী স্থিতি গ্ৰহণ কৰা কনৰাড চাংমা নেতৃত্বাধীন এন পি পি দলৰ পৰা কলিয়াবৰ লোকসভা সমষ্টিৰ প্ৰাৰ্থীত্ব লাভ কৰিছে আজিজে ৷ বৰ্তমান নিৰ্বাচনী প্ৰচাৰত ব্যস্ত থকা প্ৰাৰ্থী গৰাকীয়ে মন্তব্য কৰে যে, নাগৰিকত্ব সংশোধনী বিধেয়ক উত্থাপন কৰাৰ প্ৰথম পদক্ষেপ কংগ্ৰেছেহে লৈছিল, তাৰ পাছতহে বিজেপিৰ নাম আহে ৷
কংগ্ৰেছক মুছলমানৰ শত্ৰু বুলি উল্লেখ কৰি আজিজে কয় যে, কংগ্ৰেছৰ দিনতেই অসমত মুছলমানৰ নিধনযজ্ঞ চলিছিল ৷ অসমত সংখ্যালঘু লোকসকল এন আৰ চিৰ বাবে হাৰাশাস্তিৰ সন্মুখীন হোৱাৰ মূল কাৰণো কংগ্ৰেছ বুলিয়ে জোৰদাৰ মন্তব্য কৰে এন পি পি প্ৰাৰ্থী গৰাকীয়ে ৷ কলিয়াবৰত এতিয়া পৰাজয়ৰ আশংকাত এন পি পিৰ প্ৰাৰ্থীক কংগ্ৰেছে আক্ৰমণৰ লক্ষ্য কৰি লোৱা বুলিও তেওঁ অভিযোগ উত্থাপন কৰে ৷
