যোৰহাট, 16 ছেপ্তেম্বৰ: বৃহস্পতিবাৰে দেশজুৰি পালন কৰা হ’ব বিশ্ব খনিকৰ বিশ্বকৰ্মা পূজা ৷ কিন্তু পূজাৰ বতৰত এইবাৰ বিধি পথালি বৰুণ দেৱতাৰ । ইতিমধ্যে কৰ’ণা মহামাৰীৰ বাবেই এই বৰ্ষৰ পূজা বহু পৰিমাণে ম্লান পৰিছে যদিও তাতেই আকৌ ভূতৰ ওপৰত দানৱ পৰাদি পৰিছে নেৰা-নেপৰা বৰষুণজাক ।
পুৱাৰ পৰাই নেৰানেপেৰা বৰষুণৰ ফলত গ্ৰাহকৰ পৰিমাণ কমি আহিছে ৰাজ্যৰ বজাৰ সমূহত। তথাপি যোৰহাটৰ বজাৰত পৰিলক্ষিত হৈছে ব্যাপক ভিৰ । সৃষ্টি হৈছে যান-জঁটৰ। আনহাতে শাৰী শাৰী ৰং বিৰঙৰ মালাই যোৰহাটৰ বজাৰত সৃষ্টি কৰিছে পূজাৰ পৰিৱেশ ।
এতিয়া ভিৰ আৰু পূজাৰ পৰিৱেশ হোৱাৰ পাছতো গ্ৰাহকৰ বাবে অপেক্ষাৰত ব্যৱসায়ী সকল। পূজাৰ দিন কেইটাতে যোৰহাটৰ অস্থায়ী পদপথৰ ব্যৱসায়ী সকলৰ মুখলৈ হাঁহি আনে,কিন্তু এইবাৰ সম্পূৰ্ণ ব্যতিক্ৰম ।
কিন্তু বজাৰত হোৱা ব্যাপক ভিৰে এতিয়া আন এক চিন্তা আনিছে সচেতন মহলৰ মাজত । কৰ’ণা সংক্ৰমণৰ বাবে ইতিমধ্যে সামাজিক দূৰত্ব মানি চলা এই নিয়ম এতিয়া বগা হাতীত পৰিণত হোৱা পৰিলক্ষিত হৈছে ঠাইয়ে-ঠাইয়ে ।
