লোকসভাত ভোটদানৰ পৰা বিৰত থাকিব কটন বিশ্ববিদ্যালয়ৰ ছাত্ৰ-ছাত্ৰী

হাতে হাতে বেনাৰ প'ষ্টাৰ লৈ বিশ্ববিদ্যালয়ৰ মুখ্য প্ৰৱেশদ্বাৰৰ সন্মুখত প্ৰতিবাদ কটনিয়ানৰ

গুৱাহাটী, 28 মাৰ্চ : আগন্তুক লোকসভা নিৰ্বাচনত নিজৰ নিজৰ প্ৰাৰ্থীক বিজয় কৰিবলৈ প্ৰতিটো ৰাজনৈতিক দল ব্যস্ত থকাৰ সময়তে ৰাজপথত প্ৰতিবাদ নামিল কটন ৰাজ্যিক বিশ্ববিদ্যালয়ৰ ছাত্ৰ-ছাত্ৰীসকল । কোনো ধৰণৰ ইচ্ছ্যু নোহোৱাকৈ এটা দলে আনটো দলক গালি পাৰি নিৰ্বাচনী বৈতৰণী পাৰ কৰিব বিচাৰিছে বুলি অভিযোগ উত্থাপন কৰি এইবাৰ লোকসভা নিৰ্বাচনত ভোটদান নকৰাৰ সিদ্ধান্ত কটন বিশ্ববিদ্যালয়ৰ ছাত্ৰ-ছাত্ৰীৰ ৷কটন মহাবিদ্যালয়খনক বিশ্ববিদ্যালয়লৈ ৰূপান্তৰিত কৰি চৰকাৰে ইয়াৰ আন্তঃগাঁথনিৰ উন্নয়নৰ যি আশ্বাস প্ৰদান কৰিছিল সেই আশ্বাস আজিলৈকে চৰকাৰে পূৰণ কৰিবলৈ সক্ষম নোহোৱাত বৃহস্পতিবাৰে ৰাজপথত প্ৰতিবাদ কৰিবলৈ বাধ্য হয় বিশ্ববিদ্যালয়খনৰ ছাত্ৰ-ছাত্ৰীসকল ।

বিশ্ববিদ্যালয়খনত খালী হৈ থকা শিক্ষকৰ পদসমূহ অতি শীঘ্ৰে পূৰণ কৰাৰ লগতে ইয়াৰ অন্তৰগাঁথনিৰ উন্নয়নৰ বাবে দাবী জনায় ছাত্ৰ-ছাত্ৰীসকলে ৷ ৪৮ ঘণ্টা জোৰা অৱস্থান ধৰ্মঘট কাৰ্যসূচীৰে বিশ্ববিদ্যালয়ৰ মুখ্য প্ৰৱেশ দ্বাৰৰ সন্মুখত হাতে হাতে বেনাৰ প'ষ্টাৰ লৈ ছাত্ৰ-ছাত্ৰী সকলে চৰকাৰক অতি শীঘ্ৰে তেওঁলোকৰ দাবী সমূহ পূৰণৰ দাবী জনোৱাৰ লগতে নিৰ্বাচনত ভোটদান বৰ্জন কৰাৰ সিদ্ধান্ত গ্ৰহণ কৰে ৷