দিল্লীলৈ যাব নেকি হিমন্ত বিশ্ব শৰ্মা ?

এটা ৱেৱ পৰ্টেলত প্ৰকাশিত এক প্ৰতিবেদনত মোদীৰ সম্প্ৰসাৰিত কেবিনেটত ড৹ হিমন্ত বিশ্ব শৰ্মাৰ নাম ৷ ড৹ শৰ্মাক ৰে'ল মন্ত্ৰীৰ দৰে গুৰুত্বপূৰ্ণ দায়িত্ব দিয়া হ'ব বুলিও চৰ্চা চলিছে ।

গুৱাহাটী, 3 আগষ্টঃ প্ৰধানমন্ত্ৰী নৰেন্দ্ৰ মোদী নেতৃত্বাধীন এন ডি এ চৰকাৰৰ অচিৰেই সম্প্ৰসাৰিত হ'ব লগীয়া কেবিনেটত স্থান পাব নেকি অসমৰ প্ৰভাৱী মন্ত্ৰী ড৹ হিমন্ত বিশ্ব শৰ্মাই ! এটা ৱেব পৰ্টেলত প্ৰকাশিত এক প্ৰতিবেদনত মোদীৰ সম্প্ৰসাৰিত কেবিনেটত ড৹ হিমন্ত বিশ্ব শৰ্মাৰ নাম অন্তৰ্ভুক্ত হ'ব বুলি উল্লেখ কৰাৰ পিছতে বিষয়টোৱে ৰাজনৈতিক মহলত চৰ্চা লাভ কৰিছে। কেৱল সেয়ে নহয়, ড৹ শৰ্মাক ৰে'ল মন্ত্ৰীৰ দৰে গুৰুত্বপূৰ্ণ দায়িত্ব দিয়া হ'ব বুলিও চৰ্চা চলিছে ।

উল্লেখ্যখনীয় যে, নৰেন্দ্ৰ মোদী চৰকাৰৰ দ্বিতীয়টো কাৰ্যকালৰ প্ৰথমটো বছৰ সম্পূৰ্ণ হোৱাৰ সময়তে কেবিনেট মন্ত্ৰীৰ সংখ্যা বঢ়োৱাৰ কথা আছিল যদিও ক'ভিড- 19 কেন্দ্ৰিক অচলাৱস্থাৰ বাবে সেয়া সম্ভৱ হৈ উঠা নাছিল । আনহাতে,মোডী চৰকাৰৰ দুই জেষ্ঠ কেবিনেট মন্ত্ৰী তথা অন্যতম সমৰ কৌশল ৰচোতা ক্ৰমে অৰুণ জেটলী আৰু সুষমা স্বৰাজ অকাল মৃত্যুৰ পিছত কেইবাটাও গুৰুত্বপূৰ্ণ মন্ত্ৰালয়ৰ পৰিচালনা কৰাটো জটিল হৈ পৰিছে । গৃহমন্ত্ৰী অমিত শ্বাহৰো স্বাস্থ্যৰ অৱস্থা ভাল নহয় ।

সেয়ে এনে অৱস্থাত কেবিনেটৰ সদস্য সংখ্যা বঢ়োৱাটো এই মূহুৰ্তত জৰুৰী । আৰু তেনে প্ৰেক্ষাপটত স্বাভাৱিকতেই নাম উচ্চাৰিত হৈছে নতুনকৈ দললৈ অহা জোতিৰাদিত্য সিন্ধিয়া, দলৰ সাধাৰণ সম্পাদক ৰাম মাধৱ, বিহাৰৰ পৰা ৰাজীৱ প্ৰতাপ ৰূডী, প্ৰধানমন্ত্ৰীৰ ঘনিষ্ঠ তথা ৰাজ্য সভাৰ সাংসদ অনিল বালুনি আৰু অসমৰ ড৹ হিমন্ত বিশ্ব শৰ্মাৰ নাম । দলৰ শীৰ্ষ সূত্ৰই ইতিমধ্যে ই টি ভিক জনোৱা মতে অযোধ্যাত ৰাম মন্দিৰৰ শিলান্যাস পৰ্ব সুকলমে হৈ যোৱাৰ পিছতে সম্প্ৰসাৰণ কৰা হ'ব মোদীৰ দ্বিতীয় কাৰ্যকালৰ কেবিনেট । কিন্তু সূত্ৰটোৱে মতে অহা এপ্ৰিল মাহত ৰাজ্যৰ বিধানসভাৰ নিৰ্বাচন থকাৰ প্ৰেক্ষাপটত হিমন্ত বিশ্ব শৰ্মাক দিল্লীলৈ লৈ যোৱাৰ সম্ভাৱনা খুবেই কম । ৰাজ্যিক বিজেপিৰ নেতৃত্ব কেতিয়াও এই সিদ্ধান্তৰ পক্ষপাতী নহয় । অৱশ্যে, সূত্ৰটোৰ মতে হিমন্ত বিশ্ব শৰ্মাৰ দিল্লী গমনৰ ক্ষেত্ৰত আগতীয়া অনুমান কৰাটো কেতিয়াও সম্ভৱ নহয় । এই কথা শেষ মূহুৰ্তলৈকে জানি থাকিব কেবল প্ৰধান মন্ত্ৰী নৰেন্দ্ৰ মোদীয়েহে ।

লগতে পঢ়ক- ৰাজীৱ ভৱনত কংগ্ৰেছৰ প্ৰতাৰণা বিৰোধী দিৱস