গুৱাহাটী, 20 অক্টোবৰ : মহানগৰীৰ গাড়ীগাঁৱস্থিত শৰাইঘাট ৰংগমঞ্চত গাড়ীগাঁও ফিটনেছ কমিটিৰ উদ্যোগত অনুষ্ঠিত কৰা হয় 'মিষ্টাৰ/মিছ কামৰূপ' দেহশ্ৰী প্ৰতিযোগিতা ৷ পোনপ্ৰথমবাৰৰ বাবে গাড়ীগাঁৱত অনুষ্ঠিত এই প্ৰতিযোগিতাত পুৰুষ আৰু মহিলাৰ শাখাত প্ৰায় দুই শতাধিক প্ৰতিযোগীয়ে অংশগ্ৰহণ কৰে ৷ ভাৰত চৰকাৰৰ ক্ৰীড়া বিভাগৰ স্বীকৃতিপ্ৰাপ্ত এই 'মিষ্টাৰ/মিছ কামৰূপ' প্ৰতিযোগিতাৰ শ্ৰেষ্ঠ প্ৰতিযোগীয়ে 'মিষ্টাৰ/মিছ অসম' দেহশ্ৰী প্ৰতিযোগিতাত অংশগ্ৰহণৰ সুবিধা লাভ কৰিব ৷
তাৰোপৰি, ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত অংশগ্ৰহণ কৰাৰো সুযোগ পাব প্ৰতিযোগীসকলে । বডি বিল্ডিঙৰ প্ৰতি আকৰ্ষিত যুৱক-যুৱতীক এখন উপযুক্ত মঞ্চ দিয়াৰ লক্ষ্যৰে গাড়ীগাঁও ফিটনেছ কমিটিয়ে আয়োজন কৰিছে এই দেহশ্ৰী প্ৰতিযোগিতাৰ । উল্লেখযোগ্য যে, অন্য সংস্থাৰ দ্বাৰা আয়োজিত প্ৰতিযোগিতাৰ পৰিৱৰ্তে ভাৰত চৰকাৰৰ স্বীকৃতিপ্ৰাপ্ত প্ৰতিযোগিতাতহে অংশগ্ৰহণ কৰিবলৈ যুৱক-যুৱতীসকলক আহ্বান জনাই আয়োজক কমিটিয়ে ।
