গুৱাহাটী, ২৮ নৱেম্বৰঃ অৰ্থনৈতিকভাবে নিজৰ ভৰিত থিয় দিব পৰা, গতিশীল অৰ্থনীতিৰে আগবাঢ়ি যাব পৰাকৈ অসমক এটা নতুন ৰূপ দিয়া খনিকৰজনেই আছিল সদ্য প্ৰয়াত প্ৰাক্তন মুখ্যমন্ত্ৰী তৰুণ গগৈ । যি কথা ইতিমধ্যে তেওঁৰ সংগ এৰি অহা মন্ত্ৰী ডঃ হিমন্ত বিশ্ব শৰ্মায়ো স্বীকাৰ কৰিছে । গগৈয়ে ৰাজ্যখনৰ এক লাউলোৱা অৱস্থাত শাসনভাৰ হাতত ল'বলগীয়া হৈছিল । পূৰ্বৰ অগপ চৰকাৰে অসমৰ অৰ্থনীতি ভাঙি থানবান কৰি থৈ গৈছিল । সেই সময়ৰ মুখ্যমন্ত্ৰী প্ৰফুল্ল কুমাৰ মহন্তই অসমৰ অৰ্থনীতিক ৰাজহাড় ভাঙি থৈ যোৱাৰ পিছত যি এক বিধ্বস্ত অৱস্থাৰ পৰা অসমক পুনৰ থিয় কৰাবলগীয়া হৈছিল সেয়া কোনো সাধাৰণ কথা নাছিল ।
বিত্ত বিভাগত এতিয়াও সেই সকলো পুৰণি তথ্য লিপিবদ্ধ হৈ আছে । ৰাজ্য শাসনৰ দায়িত্ব হাতত লৈয়েই গগৈয়ে বৃদ্ধি কৰিছিল ৰাজ্যিক বাজেটৰ পৰিমাণ । মহন্ত চৰকাৰৰ কাৰ্যকালৰ শেষৰটো বছৰ অৰ্থাৎ ২০০০-২০০১ চনৰ বাৰ্ষিক বাজেট আছিল ১,৫২০ কোটি টকা । কিন্তু ২০০৮-২০০৯ বৰ্ষত গগৈয়ে বাজেট ধাৰ্য কৰিছিল ৫,০১১ কোটি টকা । অসমক পুনৰ অৰ্থনৈতিকভাবে টনকিয়াল কৰিবলৈ গগৈয়ে লোৱা সেই প্ৰয়াসক এতিয়াও স্মৰণ কৰে বহুতে ৷ প্ৰদেশ কংগ্ৰেছৰ উপ-সভাপতি ডঃ ভগীৰথ কৰণে কয় যে, গগৈ আছিল বিকশিত অসমৰ ৰূপকাৰ । মন কৰিবলগীয়া যে, যি সময়ত মহন্ত চৰকাৰৰ কাৰ্যকালত ২০০-২০০১ বৰ্ষত অসমৰ জনমুৰি আয় ১০,৭১৮ টকা আছিল, গগৈয়ে ২০০৭-২০০৮ বৰ্ষত সেই পৰিমাণ ২২,০৮৯ টকালৈ বৃদ্ধি কৰিবলৈ সক্ষম হয় । মুঠ ঘৰুৱা উৎপাদনো মহন্তৰ দিনত আছিল ২.৮ শতাংশ । কিন্তু গগৈৰ আমোলত ই ৮ শতাংশ বৃদ্ধি পায় ।
পৰিকল্পনাৰ ধনো দিছপুৰত শাসনত বহাৰে পৰাই গগৈয়ে বৃদ্ধি কৰিবলৈ আৰম্ভ কৰিছিল । ২০০০-২০০১ ত এই পৰিমাণ ১,১৩৮.২৩ কোটি হোৱাৰ বিপৰীতে ২০০১-২০০৮ ত হয়গৈ ১৫,৬০৮.৩৯ কোটি । আধুনিক অসম গঢ়াৰ কেইটামান সৰু উদাহৰণ- গগৈৰ কাৰ্যকালতে ৰাজ্যত ১৪ হাজাৰ কিল'মিটাৰ পথ নতুনকৈ পকী কৰা হয় । এহেজাৰখন কাঠৰ দলং পকীলৈ ৰূপান্তৰিত কৰা হয় । ৫৩ খন নেছনেল গেমছ অসমত অনুষ্ঠিত কৰা হয়, গুৱাহাটীত তিনিখনকৈ নতুন ফ্লাই অভাৰ নিৰ্মাণ কৰা হয়, পৰিবহণ নিগমক পুনৰুজ্জীৱিত কৰা হয় গগৈৰ দিনতেই । একেদৰে, ব্ৰহ্মপুত্ৰৰ ওপৰত কেইবাখনো নতুন দলং নিৰ্মাণ, গুৱাহাটী চিকিৎসা মহাবিদ্যালয়ক ১২০ কোটি টকা ব্যয়েৰে চুপাৰ স্পেচিয়েলিটি হাস্পতাল ৰূপে গঢ়া হয় তেওঁৰ কাৰ্যকালতে । গগৈৰ দিনৰে বহু আঁচনি বৰ্তমানৰ চৰকাৰে নতুন নামাকৰণ কৰি চলাই আছে । এয়া মাত্ৰ কেইটামান উদাহৰণহে ।
লগতে পঢ়ক : প্ৰতিবাদ দিৱস উপলক্ষে আলফা(স্বাঃ)ৰ প্ৰতিক্ৰিয়া
