গুৱাহাটী, ২২ অক্টোবৰ : ৰাজ্যত শেহতীয়াকৈ বিভিন্ন কেলেংকাৰীত নাম সাঙোৰ খাইছে বহু ৰৌ-বৰালীৰ ৷ সমাজৰ মুধা-ফুটা ব্যক্তি, বিয়াগোম বিষয়া কিম্বা ৰাজনৈতিক নেতা ৷ এক কথাত অসম আৰক্ষীৰ ওচৰত হাই প্ৰফাইল অপৰাধীৰ গোচৰ ভৰি পৰিছে ৷ এইবাৰ উৎকোচ লৈ হাতে-লোটে ধৰা পৰিল গুৱাহাটী পৌৰ নিগমৰ এগৰাকী সহকাৰী অভিযন্তা ৷
অভিযুক্ত সহকাৰী অভিযন্তাজনৰ নাম দিবাকৰ মালী বুলি জানিব পৰা গৈছে । শুকুৰবাৰে পৌৰ নিগমৰ ফাঁচী বজাৰ কাৰ্যালয়তে নগদ ৫ হাজাৰ টকা উৎকোচ লৈ থকা সময়তে হাতে-লোটে ধৰা পৰে মালী ৷ উল্লেখযোগ্য যে, দুৰ্নীতি নিবাৰক শাখাই চলোৱা এক অভিযানত গ্ৰেপ্তাৰ হয় গুৱাহাটী পৌৰ নিগমৰ সহকাৰী অভিযন্তা গৰাকী ।
জানিব পৰা মতে, ঠিকাদাৰক নলা পৰিষ্কাৰৰ নিবিদা আদায়ৰ বাবত ধন বিচাৰিছিল অভিযুক্ত মালীয়ে ৷
ঠিকাদাৰ জনৰ পৰা ইয়াৰ বিনিময়ত ৩০% ধন বিচাৰিছিল ধৃত মালীয়ে । শুকুৰবাৰে ইয়াৰে আগধন হিচাপে ৫ হাজৰ টকা লৈ থকা অৱস্থাতে হাতে লোটে গ্ৰেপ্তাৰ হয় মালী । ইয়াৰ পিছতে, ধৃত মালীৰ ফটাশিলৰ ঘৰত অভিযান চলাই ৮ লাখ টকা জব্দ কৰে দুৰ্নীতি নিবাৰক শাখাই ৷
লগতে পঢ়ক : ভাৰতীয় নাগৰিকত্ব বিচাৰি 4046 গৰাকী হিন্দু সম্প্ৰদায়ৰ লোকৰ আবেদন
