নিউজ ডেস্ক, 22 জুলাই : অসম দূৰ্যোগ প্ৰশমন বিভাগে প্ৰদান কৰা শেহতীয়া 24 ঘন্টাৰ তথ্য অনুসৰি, বৰ্তমান অসমত 26 খন জিলা বানৰ কবলত আছে ৷ আনহাতে, 75 টা ৰাজহ চক্ৰৰ প্ৰায় 2,525 খন গাঁও আক্ৰান্ত হৈ আছে বানত ৷ প্ৰায় 1,15,515.25 হেক্টৰ কৃষিভূমি বৰ্তমান পানীৰ তলত ৷
যোৱা 24 ঘন্টাত দুজন লোকে বানৰ ফলত প্ৰাণ হেৰুওৱাৰ ফলত বৰ্তমানলৈকে বানত মৃত্যু হোৱা লোকৰ সংখ্যা 89 গৰাকীলৈ বৃদ্ধি পাইছে ৷ ইয়াৰোপৰি, 26,31,343 গৰাকী লোক বানত আক্ৰান্ত হৈছে ৷ সৰ্বমুঠ 391 টা আশ্ৰয় শিবিৰত বাস কৰি আছে 45,281 গৰাকী লোকে ৷
আনহাতে, কেন্দ্ৰীয় জলশক্তি মন্ত্ৰী গজেন্দ্ৰ সিং শ্বেখাৱটৰ সৈতে সৰ্বানন্দ মুখ্যমন্ত্ৰী সোণোৱালে ভিডিঅ' কনফাৰেন্সিঙৰ জৰিয়তে বাৰ্তালাপ কৰে৷ কেন্দ্ৰীয় মন্ত্ৰীগৰাকীয়ে সোণোৱালক জনোৱা অনুসৰি, বান ব্যৱস্থাপনা আঁচনিৰ অধীনত অতি শীঘ্ৰে কেন্দ্ৰীয় চৰকাৰে প্ৰথম কিস্তিত 346 কোটি টকা মুকলি কৰি দিব৷ নামনি অসমৰ বান সমস্যা সমাধানৰ বাবেও কেন্দ্ৰীয় চৰকাৰে অতি শীঘ্ৰে ভূটান চৰকাৰৰ সৈতে আলোচনাত মিলিত হ'ব বুলিও সোণোৱালে জানিবলৈ দিয়ে ৷
লগতে পঢ়ক : বাঘজানত পুনৰ দুৰ্ঘটনা : তৈলক্ষেত্ৰত বিস্ফোৰণত আহত তিনি বিশেষজ্ঞ
