গুৱাহাটী, 3 অক্টোবৰঃ পেট্ৰলজাত সামগ্ৰী, যন্ত্ৰাংশ, বীমা বৃদ্ধিৰ লগতে আনুসংগিক সকলো দ্ৰব্যৰ মূল্যবৃদ্ধিৰ পৰিপ্ৰেক্ষিতত ভাড়া বৃদ্ধিৰ দাবীত বৃহস্পতিবাৰে সদৌ অসম মটৰ পৰিবহণ সন্থাৰ চকাবন্ধ কাৰ্যসূচী ৷ ভাড়া বৃদ্ধিৰ দাবীত পৰিবহণ সন্থাটো চৰকাৰক বাৰম্বাৰ দাবী জনোৱাৰ পিছতো চৰকাৰে কোনো গুৰুত্ব প্ৰদান নকৰাৰ বাবেই সন্থাটোৱে ৩ অক্টোবৰ পুৱা ৫ বজাৰ পৰা ৪ অক্টোবৰৰ পুৱা ৫ বজালৈ আহ্বান কৰিছে 24 ঘন্টীয়া চকাবন্ধ কাৰ্যসূচী ৷
এই বন্ধৰ ব্যাপক প্ৰভাৱ দেখা গৈছে সদা ব্যস্ত ৰাজ্যখনৰ মূলকেন্দ্ৰ গুৱাহাটীটো । বন্ধৰ ফলত মহানগৰীত বন্ধ থাকিল দুৰণিবতীয়া, চিটি বাছৰ সেৱা । যাৰ বাবে হাহাকাৰ পৰিস্থিতিৰ সৃষ্টি হৈছে সাধাৰণ যাত্ৰীৰ মাজত । ঘন্টাৰ পিছত ঘন্টা ধৰি যাত্ৰীবাহী বাছৰ বাবে বাছ আস্থানত অপেক্ষাৰত হৈ থাকিবলগীয়া হৈছে বহু যাত্ৰী । যাতায়তৰ মূল প্ৰাণ কেন্দ্ৰ জালুকবাৰী, আদাবাৰী, মালিগাঁও, ভৰলুমুখ, খানাপাৰা আদি স্থানত হাৰাশাস্তিৰ সন্মুখীন হৈছে সাধাৰণ যাত্ৰীসকল । দুৰ্গা পূজাৰ প্ৰাকক্ষণত এই বন্ধকলৈ ক্ষুব্ধ যাত্ৰীসকল ।
