গুৱাহাটী, 27 ছেপ্টেম্বৰ : কৰ'ণা মহামাৰী, লকডাউন, কৰ্মহীনতা আদিৰ হেঁচাত পৰি অসমলৈ উভতি অহা লক্ষাধিক শ্ৰমিকৰ অধিকাংশই বিভিন্ন ধৰণে নিজৰ ৰাজ্যখনত ভাতমুঠি মোকলোৱাৰ চেষ্টা অব্যাহত ৰাখিছে । এই ক্ষেত্ৰত ৰাজ্যৰ পঞ্চায়ত আৰু গ্ৰামোন্নয়ন বিভাগেও বহিঃৰাজ্যৰ পৰা প্ৰব্ৰজিত এইসকল শ্ৰমিকক পাৰ্যমানে সংস্থাপন দিয়াৰ চেষ্টা চলাইছে । ইটিভি ভাৰতৰ আগত এই কথা প্ৰকাশ কৰিছে পঞ্চায়ত আৰু গ্ৰামোন্নয়ন বিভাগৰ আয়ুক্ত হেমেন দাসে ।
তেওঁ কয় যে বহিঃৰাজ্যৰ পৰা প্ৰব্ৰজিত এইসকল শ্ৰমিকৰ সঠিক তথ্য লাভ কৰিবলৈ "সম্পৰ্ক" নামেৰে এক আঁচনিৰ জড়িয়তে পঞ্জীয়নৰ ব্যৱস্থা কৰিছিল পঞ্চায়ত আৰু গ্ৰামোন্নয়ন বিভাগে । সেই আঁচনিত প্ৰায় 67 হাজাৰ প্ৰব্ৰজিত শ্ৰমিকে নিজৰ নাম পঞ্জীয়ন কৰে । ইয়াৰে 21 হাজাৰ শ্ৰমিকে জবকাৰ্ড বিচাৰে । 11 হাজাৰ লোকে এমজি এনৰেগাৰ অধীনত কাম কৰিবলৈ আগ্ৰহ প্ৰকাশ কৰে আৰু তেওঁলোকৰ প্ৰায় সকলোকে কামৰ ব্যৱস্থা কৰি দিয়া হৈছে ।
আনহাতে, প্ৰায় 2500 জন কাঠমিস্ত্ৰী, ৰাজমিস্ত্ৰী আদিয়ে সংস্থাপন বিচৰাত তেওঁলোককো ইতিমধ্যে প্ৰধানমন্ত্ৰী আৱাস যোজনাৰ কামত নিয়োগৰ ব্যৱস্থা কৰি দিছে চৰকাৰে ৷
লগতে পঢ়ক : ভাৰতীয় ফুটবল দলক প্ৰতিনিধিত্ব কৰা মৰিগাঁৱৰ বিষ্ণু বৰদলৈ
