গুৱাহাটী, 28 মে' : অপৰিবৰ্তিত হৈ আছে ৰাজ্যৰ বান পৰিস্থিতি । বৰ্তমানেও বানৰ ফলত ৰাজ্যত প্ৰভাৱিত হৈ আছে 2,94,170 গৰাকী লোক । বান প্ৰভাৱিত জিলাৰ সংখ্যা পূৰ্বৰ 11 খনৰ পৰা 9 লৈ হ্ৰাস পাইছে ।
ৰাজ্যৰ শেহতীয়া বান পৰিস্থিতি অধিক জটিলৰ দিছে গতি কৰিছে ৷ বুধবাৰে ৰাজ্যৰ 11 খনকৈ জিলা বানপানীৰ ফলত প্ৰভাৱিত আছিল আৰু বৃহস্পতিবাৰৰ দিনটোত 2 খন জিলাত বান পৰিস্থিতি কিছু উন্নত হোৱাত বৰ্তমান 9 খন জিলা বানপানীৰ ফলত প্ৰভাৱিত হৈ আছে । ৰাজ্যৰ 9 খন জিলাৰ 15 খন ৰাজহ চক্ৰৰ 300 খনকৈ গাঁও এতিয়া পানীৰ তলত ।
বুধবাৰৰ তুলনাত 21 খনকৈ গাঁৱত হ্ৰাস পাইছে বাঢ়নী পানী । ধেমাজি, নগাঁও, হোজাই, দৰং, নলবাৰী, গোৱালপাৰা, পশ্চিম কাৰ্বি আংলং, ডিব্ৰুগড় আৰু তিনিচুকীয়া জিলাৰ বিস্তৃত অঞ্চলত এতিয়াও পানীৰ তলতে আছে । বছৰৰ প্ৰথমটো বানে ৰাজ্যৰ কৃষিজীৱি ৰাইজলৈ অধিক সংকট কঢ়িয়াই অনা পৰিলক্ষিত হৈছে । এতিয়া ৰাজ্যৰ 21,572.30 হেক্টৰ কৃষিভূমি বাঢ়নী পানীৰ তলত । বানপানীৰ ফলত এতিয়া বহু ৰাইজ ঘৰ এৰি ৰাজপথত আশ্ৰয় ল'বলৈ বাধ্য হৈছে ।
ৰাজ্যৰ বান প্ৰভাৱিত 9 খন জিলাৰ ভিতৰত গোৱালপাৰা আৰু নলবাৰী জিলা সবাতোকৈ বেছি প্ৰভাৱিত হৈছে । গোৱালপাৰা জিলাত মেঘালয়ৰ পানীয়ে বহু অঞ্চল প্লাৱিত কৰাৰ বিপৰীতে বুধবাৰে নলবাৰী জিলাত বুঢ়াদিয়া নদীয়ে মথাউৰি চিঙি পেলোৱাত নলবাৰী জিলাৰ বান পৰিস্থিতি অধিক ভয়াৱহ হৈ পৰিছে । ৰাজ্যত জীয়া ভৰালী, পুঠিমাৰী আৰু নিমাটিঘাটত ব্ৰহ্মপুত্ৰ নদী বিপদ সীমাৰ ওপৰেৰে বৈ আছে ।
