গুৱাহাটী, 22 জুন : 2021 বিধানসভা নিৰ্বাচনত মিত্ৰতা কৰিব নেকি কংগ্ৰেছ আৰু এআইইউডিএফে ? নিৰ্বাচনৰ দিন যিমানেই চমু চাপিছে সিমানেই ৰাজ্যৰ ৰাজনৈতিক মহলত সবাতোকৈ চৰ্চিত বিষয় হৈ পৰিছে এই প্ৰসংগটো । কিন্তু ভিতৰি যিয়েই নচলক কিয়, মিত্ৰতা প্ৰসংগত শেহতীয়াকৈ বদৰুদ্দিন আজমল নেতৃত্বাধীন এআইইউডিএফে গ্ৰহণ কৰিছে কৌশলী স্থিতি ।
ইটিভি ভাৰতৰ হাতত আহি পৰিছে এখন পত্ৰ, যিখন পত্ৰত স্বাক্ষৰ কৰিছে দলটোৰ সাধাৰণ সম্পাদক (সাংগঠনিক) আমিনুল ইছলামে । ইতিমধ্যে দলটোৰ সকলো জিলা সমিতিৰ সভাপতি, সম্পাদক আৰু বিধায়কসকললৈ প্ৰেৰণ কৰা হৈছে এইখন পত্ৰ ।
পত্ৰখনত কোৱা হৈছে, আগন্তুক বিধানসভা নিৰ্বাচনত এআইইউডিএফে কোন দলৰ সৈতে মিত্ৰতা কৰিব বা নকৰিব সেই বিষয়ে চূড়ান্ত সিদ্ধান্ত গ্ৰহণ কৰিব দলটোৰ কৰ্ণধাৰ সমিতিয়ে ।
গতিকে মিত্ৰতা প্ৰসংগত যাতে সংবাদ মাধ্যমতে হওক বা আন কোনো সামাজিক মাধ্যমতে হওক, কোনো বিধায়ক বা নেতাই যাতে মুখ নুখুলে । স্বাভাৱিকতে দলটোৱে জাৰি কৰা এই নিৰ্দেশনাই এতিয়া তাৎপৰ্যপূৰ্ণ ভাৱে বিবেচিত হৈছে ।
আনহাতে এই নিৰ্দেশনা প্ৰসংগত দলটোৰ সাধাৰণ সম্পাদক (সাংগঠনিক) আমিনুল ইছলামে ইটিভি ভাৰতৰ আগত কয়, মিত্ৰতা প্ৰসংগত এতিয়াও কংগ্ৰেছৰ ফালৰ পৰা প্ৰস্তাৱ আহিয়েই আছে । কিন্তু এই বিষয়ত চূড়ান্ত সিদ্ধান্ত ল'ব দলৰ কৰ্ণধাৰ সমিতিয়ে ।
গতিকে এই বিষয়টোত দলৰ কোনো বিধায়ক বা নেতাই যাতে কোনোধৰণৰ মন্তব্য নকৰে তাৰ বাবে এই নিৰ্দেশনা জাৰি কৰা হৈছে । যদি কোনোবাই এই বিষয়ত মন্তব্য কৰেও সেয়া তেওঁৰ ব্যক্তিগত মন্তব্য বুলিহে গ্ৰাহ্য কৰা হ'ব বুলি স্পষ্ট কৰি দিয়ে সম্পাদকগৰাকীয়ে ।
