গুৱাহাটী, ২২ জুন: "ঝুমলাবাজি আৰু ভেল্কিবাজী বন্ধ কৰক ।" চৰকাৰলৈ এই আহ্বান কাৰাৰুদ্ধ বিধায়ক(MLA) অখিল গগৈৰ। মঙলবাৰে 'নিয়া'ৰ আদালতে অখিল গগৈক চাবুৱা থানাৰ নিয়াই (NIA) লোৱা গোচৰটোৰ পৰা দোষমুক্ত কৰে । ইফালে আদালত চৌহদত ৰাইজৰ দলৰ কাৰ্যকৰী সভাপতি ভাস্কো ডি শইকীয়াই বিধায়ক অখিল গগৈৰ এখন পত্র সংবাদ মাধ্যমৰ আগত পাঠ কৰে ।
পত্রযোগে অখিল গগৈয়ে ক'ভিড নিয়ন্ত্ৰণত চৰকাৰখন ব্যৰ্থ হোৱাৰ অভিযোগ তুলি ক'ভিড পৰিস্থিতিত ক্ষতিগ্ৰস্ত হোৱা লোকসকলক উপযুক্ত ক্ষতিপূৰণ দিয়াৰ দাবী উত্থাপন কৰে । অখিল গগৈয়ে পত্ৰযোগে উল্লেখ কৰা অভিযোগ অনুসৰি, অসমতো ভাৰতবৰ্ষৰ দৰে একনায়কত্ববাদ আৰু ফেচিবাদৰ প্ৰতিধ্বনি শুনা গৈছে । তেওঁ ৰাইজক সজাগ-সচেতন হোৱাৰ বাবেও আহ্বান জনায় ।
চাবুৱা থানাৰ 'নিয়া'(NIA)ৰ গোচৰত চার্জ শুনানিৰ অন্তত ৰেহাই পালে অখিল গগৈয়ে । 'নিয়া'ৰ বিশেষ আদালতত হোৱা মঙলবাৰৰ শুনানিত অখিল গগৈৰ লগতে জগজিৎ গোহাঁই আৰু ভূপেন গগৈক দোষমুক্ত কৰিলে আদালতে । চাবুৱা থানাৰ গোচৰৰ সকলো অভিযোগৰ পৰা ৰেহাই দিয়া হ'ল তিনিওজনকে ৷ অৱশ্যে চানমাৰি থানাৰ গোচৰটোৰ শুনানি এতিয়াও চলি আছে ।
ইফালে অখিল গগৈক মাতৃক সাক্ষাৎ কৰিবৰ বাবে অনুমতি বিচাৰি আজি অদালতত আবেদন জনোৱা হৈছে । ৫৫ পৃষ্ঠাৰ অৰ্ডাৰ পাছ কৰিছে আদালতে ৷ একেদৰে চাবুৱা থানাৰ গোচৰ সন্দৰ্ভত আন এজন অভিযুক্ত ভাস্কৰজ্যোতি ফুকনে ৰেহাই নাপালে । তেওঁৰ গোচৰৰ শুনানি ডিব্ৰুগড়ৰ আদালতত চলিব ৷ আনহাতে নিয়াই আৰোপ কৰা সকলো অভিযোগৰ পৰা ৰেহাই পালে অখিল গগৈয়ে ।
