মৰাণ, 8 জুলাই : ডিব্ৰুগড়ৰ লেপেটকটাত ধৰ্মীয় নীতি নিয়মেৰে অনুষ্ঠিত হ'ল সোণোৱাল কছাৰী সকলৰ কৃষিভিত্তিক পৰম্পৰাগত উৎসৱ পানীতোলা সবাহ ৷ উজনি অসমৰ এক শক্তিশালী জনগোষ্ঠী হ’ল সোণোৱাল কছাৰীসকল । সোণোৱাল কছাৰীসকলে পৰম্পৰা ৰক্ষা কৰি অনুষ্ঠিত কৰি আহিছে কৃষিভিত্তিক পৰম্পৰাগত উৎসৱ পানীতোলা সবাহ (Panitola festival celebrated by Sonowal Kachari) ।
এই পৰম্পৰা ৰক্ষা কৰি ধৰ্মীয় নীতি নিয়মেৰে ১৪৮৮ চনতেই স্থাপিত লেপেটকটা কছাৰী গাঁৱৰ নামঘৰটোত সোণোৱাল কছাৰী ৰাইজে বৃহস্পতিবাৰে অনুষ্ঠিত কৰিলে কৃষিভিত্তিক পৰম্পৰাগত উৎসৱ পানীতোলা সবাহ (Panitola festival celebrated at Lepetkata) । প্ৰতি ৫ বছৰৰ মুৰে মুৰে এই নামঘৰটোত সোণোৱাল কছাৰীসকলে পৌৰাণিক নীতি অনুসৰি আহাৰ মাহৰ যি কোনো এটা দিনত এই পানীতোলা সবাহ পালন কৰি আহিছে (Traditional Panitola festival) ।
এই পানীতোলা সবাহত দুগৰাকী পুষ্পিতা নোহোৱা ছোৱালীক দুদিনৰ আগৰ পৰাই উপবাসে ৰাখি নামঘৰৰ মণিকুটৰ কাষত বহুৱাই নাম গাই গাঁৱৰ সকলো একত্ৰিত হৈ গায়ন-বায়নৰে নদী বা ৰাজহুৱা পুখুৰীলৈ ছোৱালী দুগৰাকীক লৈ গৈ তেওঁলোকৰ দ্বাৰাই পানী তুলি নামঘৰলৈ আনি মধ্য খুঁটাত ঢালি নামঘৰটো শুদ্ধি কৰা হয় ৷
লগতে এই পৰম্পৰাৰ জৰিয়তে পথাৰত ধানৰ থোক ওলোৱাৰ সময়ত কৃষক ৰাইজৰ সোণোৱালী পথাৰত যাতে ধান উপচি পৰে, পোক-পৰুৱাই অনিষ্ট নকৰাৰ লগতে গাঁওখনৰ অপায়-অমংগল দূৰ হয় তাৰ বাবে প্ৰাৰ্থনা কৰা হয় ।
উল্লেখ্য যে, প্ৰতিষ্ঠা হোৱাৰ দিনৰে পৰা এই বৰ নামঘৰত শংকৰদেৱ, মাধৱদেৱৰ তিথিকে ধৰি বিভিন্ন ধৰ্মীয় অনুষ্ঠান আয়োজন কৰি অঞ্চলটোত এক ধৰ্মীয় পৰিৱেশ সৃষ্টিৰ চেষ্টা অব্যাহত ৰাখিছে সোণোৱাল কছাৰীসকলে ।
লগতে পঢ়ক: বার্ণল নহয়, এতিয়া ফেনাইল, ব্লিছিং পাউদাৰ বিতৰণৰ সময়: বিজেপিৰ ৰাজ্যিক যুৱ মৰ্চা
