ডিব্ৰুগড়, 6 জুলাইঃ চৰকাৰে গ্ৰহণ কৰা নতুন ভূমি নীতিৰ বিৰুদ্ধে ডিব্ৰুগড়ত টাই আহোম যুৱ পৰিষদৰ তীব্ৰ প্ৰতিবাদ ৷ অতি শীঘ্ৰে চৰকাৰক এই নতুন ভূমি নীতি বাতিল কৰিবলৈ সকিয়াই দিয়ে প্ৰতিবাদকাৰী সকলে ৷
নতুন উদ্যোগ নীতিৰ অধ্যাদেশ প্ৰত্যাহাৰ আৰু খিলঞ্জীয়াৰ ভূমি নীতিৰ অধিকাৰ সুৰক্ষিত কৰাৰ দাবীত টাই আহোম যুৱ পৰিষদে সোমবাৰে ডিব্ৰুগড়ত প্ৰতিবাদ সাব্যস্ত কৰে । প্ৰতিবাদকাৰী সকলে ডিব্ৰুগড় আৰক্ষী অধীক্ষকৰ কাৰ্যালয়ৰ সমীপৰ ৩৭নং ৰাষ্ট্ৰীয় ঘাইপথত ভূমি নীতিৰ প্ৰতিলিপি দাহ কৰে ৷ লগতে চৰকাৰৰ বিৰুদ্ধে বিভিন্ন শ্ল'গান দি পৰিৱেশ উত্তাল কৰি তোলে প্ৰতিবাদকাৰী সকলে । অসমীয়াৰ ভূমিৰ অধিকাৰ সুৰক্ষিত কৰা আৰু নতুন উদ্যোগ নীতিক সমালোচনা কৰি চৰকাৰৰ এই সিদ্ধান্ত জাতি বিৰোধী আখ্যা দি এনে হঠকাৰী সিদ্ধান্ত অতি শীঘ্ৰে প্ৰত্যাহাৰ কৰাৰ দাবী জনায় ।
তাৰোপৰি, উদ্যোগ স্থাপনৰ নামত খিলঞ্জীয়াৰ হাতত থকা ভূমি অনা অসমীয়াই কোনো কাৰণতে যাতে ক্ৰয় কৰিব নোৱাৰে তাৰ বাবে প্ৰয়োজন হ'লে তীব্র গণ আন্দোলন গঢ়ি তোলাৰ হুংকাৰ দিছে সংগঠনটোৱে । অন্যথা আগন্তুক নিৰ্বাচনৰ সময়ত বিজেপি ভোট বিচাৰি থলুৱা খিলঞ্জীয়াৰ গাৱঁত প্ৰৱেশ কৰিব নোৱাৰিব বুলি হুংকাৰ দিয়ে ৷ লগতে ছয় জনগোষ্ঠীৰ লগতে টাই আহোম জনগোষ্ঠীটোক অতি শীঘ্ৰে অনুসূচিত জনজাতি ঘোষণা কৰিবলৈ চৰকাৰক দাবী জনাই সংগঠনটোৰ সদস্য সকলে ৷
লগতে পঢ়ক- ভূমি নীতি প্ৰৱৰ্তনৰ বিৰুদ্ধে কৃষক মুক্তি সংগ্ৰাম সমিতিৰ প্ৰতিবাদ
