মৰাণ, 24 নৱেম্বৰ : ৰাজ্যৰ মুখ্যমন্ত্ৰীগৰাকীয়ে দুৰ্নীতি আৰু লুণ্ঠন নিৰ্মূল কৰাৰ বাবে তৎপৰতা প্ৰদৰ্শন কৰা পাছতো বিভিন্ন খণ্ডত অব্যাহত আছে দুৰ্নীতি ৷ ডিব্ৰুগড়ত চৰকাৰী আঁচনি ৰূপায়ণত দেখিবলৈ পোৱা গৈছে ব্যাপক অনিয়ম আৰু দুৰ্নীতি (corruption in govt scheme at dibrugarh) । ডিব্ৰুগড় জিলাৰ জকাই চেঁচা ম’হমাৰীৰ পৰা ঢৰীয়াতলী আৰু টিমনা হৈ লাহোৱাল কলেজ সংযোগী পথচোৱা নিৰ্মাণত ব্যাপক বিসংগতিৰ অভিযোগ উত্থাপন কৰিছে স্থানীয় ৰাইজে । ঠিকাদাৰৰ বিৰুদ্ধে দুৰ্নীতি সংঘটিত কৰাৰ অভিযোগ (allegation of corruption against contractor)
প্ৰায় ছয় কোটি টকা ব্যয়েৰে নিৰ্মাণ হোৱা পথচোৱা নিৰ্মাণৰ এদিনৰ পিছতেই চপৰা চপৰে খহিবলৈ ধৰিছে আলকাতৰাৰ প্ৰলেপ । জকাই ম'হমাৰী গাঁৱৰ লোকসকলে তিখেশ্বৰ বুঢ়াগোঁহাই নামৰ ঠিকাদাৰজনৰ অধীনত চলি থকা পথ নিৰ্মাণৰ কাম নিম্ন মানদণ্ডৰ হোৱাৰ বাবে বন্ধ কৰি ৰাখিছিল । কিন্তু কাম বন্ধ কৰাৰ পিছতো কেইজনমান ঠিকাদাৰে পথচোৱা নিৰ্মাণৰ কাম উপ-ঠিকাত লৈ একপ্ৰকাৰে লুণ্ঠন চলোৱাৰ অভিযোগ উত্থাপিত হৈছে । ইয়াৰ পাছতে ক্ষোভিত হৈ পৰিছে ৰাইজ ।
স্থানীয় ৰাইজে অৱশেষত অভিযন্তাৰ সন্মুখতেই উদঙালে ঠিকাদাৰৰ নগ্নস্বৰূপ । বিভাগীয় বিষয়া, অভিযন্তাৰ অৱহেলাৰ বাবে ঠিকাদাৰে এইদৰে লুন্ঠন চলাবলৈ সুযোগ পাইছে বুলি ক্ষোভ প্ৰকাশ কৰে ৰাইজে । বুধবাৰে লাহোৱালত ক্ষোভিত ৰাইজে ঘেৰাও কৰে অভিযন্তা আৰু ঠিকাদাৰক । স্থানীয় ৰাইজৰ অভিযোগ অনুসৰি পথটোৰ যিসমূহ আসোঁৱাহ আছে সেইসমূহ সমস্যা সমাধান নকৰা পৰ্যন্ত ঠিকাদাৰ পক্ষক কাম কৰাত বাধা আৰোপ কৰিব ।
লগতে পঢ়ক : শোচনীয় অৱস্থা অসম ত্ৰিপুৰা সংযোগী ৰাষ্ট্ৰীয় ঘাইপথৰ
