ডিব্ৰুগড়, 19 মাৰ্চঃ আগন্তুক বিধানসভা নিৰ্বাচনত বিজেপিক ভোটদান নকৰিবলৈ আহ্বান জনাইছে চুতীয়া যুৱ সন্মিলনে ৷ চুতীয়া জনগোষ্ঠীৰ হৈ ৰাজ্যৰ লখিমপুৰ, বিপুৰীয়া, নাওবৈছা, গোলাঘাট, টিয়ক, সৰুপথাৰ, তিতাবৰ আদি সমষ্টিত বিজেপিৰ প্ৰাৰ্থী দাবী কৰিছিল চুতীয়া জনগোষ্ঠীৰ পৰা । কিন্তু বিজেপি দলে বিষয়টোৰ ওপৰত কোনো গুৰুত্ব প্ৰদান নকৰিলে ৷ ফলস্বৰূপে বিজেপিক চুতীয়া জনগোষ্ঠীৰ লোকক ভোটদান নকৰিবলৈ শুকুৰবাৰে ডিব্ৰুগড়ত সংবাদমেল অনুষ্ঠিত কৰি অনুৰোধ জনালে চুতীয়া যুৱ সন্মিলনে ।
পূৰ্বৰ দৰে পুনৰ ৰাইজক ঠগিবলৈ বিজেপি দলে ৰাজ্যখনত নিৰ্বাচনী প্ৰচাৰ চলাই আছে । পূৰ্বতে নিবনুৱা সমস্যা সমাধান কৰা, ৰাজ্যৰ ছয় জনগোষ্ঠীক জনজাতিকৰণৰ মৰ্যদা প্ৰদান কৰা আদিকে ধৰি বহু কথা কৈ শাসনলৈ আহিছিল যদিও কোনো কাম কাৰ্যকৰি নকৰিলে । বিজেপি দললৈ এই অভিযোগ উত্থাপন কৰি ৰাজ্যৰ চুতীয়া জনগোষ্ঠীক বিবেক ভোটদান কৰিবলৈ আহ্বান জনাইছে চুতীয়া যুৱ সন্মিলনে ৷ চৰকাৰে চুতীয়া জনগোষ্ঠীক জনজাতিৰ মৰ্যদা প্ৰদান নকৰালৈকে আন্দোলন চলাই যোৱাৰো হুংকাৰ প্ৰদান কৰিছে সদৌ অসম চুতীয়া যুৱ সন্মিলনৰ কৰ্মকৰ্তাই ।
