ডিব্ৰুগড়, 19 জুন : ডিব্ৰুগড় চহৰৰ গাতে লাগি থকা মোহনাঘাটত নিশা সংঘটিত হয় ভয়াৱহ খহনীয়া । পলকতে বৰলুইতৰ বুকুত জাহ যায় 6 টাকৈ আবাসগৃহ । চহৰৰ সুৰক্ষা বান্ধৰ কাষতে বৰলুইতে খহাই নিলে বৃহৎ ভূমিসহ আবাসগৃহ কেইটা ।
যাৰ ফলত ঐতিহাসিক চহৰখনলৈ ভাবুকি বাঢ়ি আহিছে । চহৰৰ সুৰক্ষাৰ বাবে থকা শক্তিশালী মথাউৰিৰ কাষ পাবলৈ কেইমিটাৰমান বাকী ৰৈছে খহনীয়া আৰম্ভ কৰা বৰলুইতৰ জলপৃষ্ঠ । ইতিমধ্যে তিনিখন গাড়ীৰে অনা হৈছে পাৰ্কুপাইন । উৰে নিশা চলি থাকে খহনীয়া প্ৰতিৰোধৰ ব্যৱস্থা । পুনৰ পুৱাৰ ভাগত জিঅ' বেগসহ খহনীয়া প্ৰতিৰোধৰ বাবে ব্যৱস্থা কৰা হ'ব । ইতিমধ্যে খহনীয়াস্থলীত উপস্থিত হৈছে স্থানীয় বিধায়ক প্ৰশান্ত ফুকনসহ জলসম্পদ বিভাগৰ লোকৰ সৈতে সমাজ সচেতন ব্যক্তি, চিকিৎসক ভাস্কৰ পাপুকন গগৈ । ইফালে সৰ্বশ্ৰান্ত হোৱা পৰিয়ালকেইটাক মথাউৰিত আশ্ৰয়ৰ ব্যৱস্থা কৰা হৈছে ।
উল্লেখ যে 180 বছৰ পুৰণি ঐতিহাসিক ডিব্ৰুগড় চহৰৰ প্ৰতি এই খহনীয়াই প্ৰবল ভাবুকি কঢ়িয়াই আনিছে । স্থায়ী সমাধানৰ ব্যৱস্থা নকৰিলে এই খহনীয়াত চহৰখন জাহ যোৱাৰ উপক্ৰম ঘটাৰ নিশ্চিত ইংগিত বহন কৰিছে এই খহনীয়াই ।
লগতে পঢ়কঃ জলসম্পদ বিভাগৰ গাঁফিলতিৰ ফলত মথাউৰিলৈ অহিছে ভাবুকি
