ডিব্ৰুগড়, 21 জুন : অসমত অব্যাহত আছে অৰুণাচলী সুৰাৰ অবৈধ ৰমৰমীয়া বেহা ৷ বিগত এমাহ ধৰি ৰাজ্যৰ বিভিন্ন প্ৰান্তৰ পৰা জব্দ কৰা হৈছে অৰুণাচলী সুৰা ৷ আবকাৰী বিভাগৰ তৎপৰতাত আটক কৰা সৰবৰাহকাৰীক ৷
সোমবাৰে ডিব্ৰুগড় জিলাৰ বিভিন্ন প্ৰান্তত আবকাৰী বিভাগে অৰুণাচলী সুৰাৰ বিৰুদ্ধে অভিযান চলায় ৷ এই অভিযান কালত ডিব্ৰুগড় জিলাৰ বিভিন্ন প্ৰান্তত অৰুণাচলী সুৰাত অসমৰ লেবেল লগাই অবৈধভাৱে বিক্ৰী কৰাৰ ঘটনা পোহৰলৈ আহে ৷ লগতে আৰক্ষীয়ে জব্দ কৰে 130 কাৰ্টন সুৰা আৰু 58 কাৰ্টন বিয়েৰ ৷ অৰুণাচলৰ সুৰাখিনিত অসমৰ লেবেল লগাই থাকোতে হাতে-লোটে ধৰা পৰে চাবুৱাৰ পংকজ গগৈ নামৰ এজন সুৰাৰ অবৈধ ব্যৱসায়ী ৷
জানিব পৰা মতে, আটকাধীন পংকজ গগৈয়ে দীৰ্ঘদিন ধৰি অৰুণাচলী সুৰাত অসমৰ লেবেল লগাই দুগুণ দামত বিক্ৰী কৰি এই অবৈধ সুৰাৰ ৰমৰমীয়া বেহা চলাই আছে বুলি জানিব পৰা গৈছে ৷ আবকাৰী বিষয়াই প্ৰকাশ কৰা মতে, উজনি অসমৰ ডিব্ৰুগড়, লখিমপুৰকে ধৰি বিভিন্ন অঞ্চলত অৰুণাচলী সুৰাৰ বেহা অব্যাহত আছে ৷ পৰ্যায়ক্ৰমে আবকাৰী বিভাগে অভিযান চলাই যাব বুলি জানিবলৈ দিয়ে ৷
চলিত মাহতে নলবাৰী জিলাৰ গণেশ মন্দিৰ চ’কত এখন কণ্টেইনাৰ ট্ৰাকত আবকাৰী বিভাগে অভিযান চলাই বৃহৎ পৰিমাণৰ সুৰা জব্দ কৰাৰ লগতে আটক কৰিছিল গাড়ীৰ চালকক ৷ উল্লেখ্য যে, মুখ্যমন্ত্ৰীৰ নিৰ্দেশৰ পাছতেই ৰাজ্যত ড্ৰাগছ, গাঞ্জা, অবৈধ সুৰাৰ বিৰুদ্ধে আৰক্ষী, আবকাৰী বিভাগে অভিযান তীব্ৰতৰ কৰি তুলিছে ৷ চলিত মাহতে অসম আৰক্ষী আৰু আবকাৰী বিভাগে 50 কোটি টকাৰ এনে অবৈধ সামগ্ৰীৰ লগতে আটক কৰিছে এশতকৈ অধিক সৰবৰাহকাৰীক ৷
লগতে পঢ়ক : উত্তৰ গুৱাহাটীৰ উদ্যোগত ভয়ংকৰ অগ্নিকাণ্ড
