গৌৰীপুৰ, 9 ছেপ্তেম্বৰ: গৌৰীপুৰৰ ক্ষুদ্ৰ সোণ ব্যৱসায়ী আক্তাৰ হুছেইনৰ অপহৰণ কাণ্ডৰ ঘটনা সন্দৰ্ভত সোমবাৰে আৰক্ষীৰ জালত পৰিল দুই যুৱক৷ হুছেইনৰ পৰিয়ালে আটানী আৰক্ষী চকীত ঘটনা সংক্ৰান্তত দাখিল কৰা এখন এজাহাৰৰ ভিত্তিত ৰাইজৰ সহযোগত অতি কৌশলগত ভাৱে দুই যুৱক ক্ৰমে ৰমজান আলী আৰু সাহ আলম সেখক গ্ৰেপ্তাৰ কৰে আৰক্ষীয়ে৷ পৰিয়ালৰ লোকে ইটিভি ভাৰতক জনোৱা অনুসৰি 7 ছেপ্তেম্বৰৰ পুৱা দুগৰাকী যুৱকে অতি কম মূল্যত সোণ ক্ৰয় কৰি দিয়াৰ প্ৰলোভন দি দুখন মটৰ চাইকেলেৰে লৈ গৈ নাটকীয় ভাবে অপহৰণ কৰে আক্তাৰ হুছেইনক ৷ তাৰ পাছত তেঁওক যন্ত্ৰ চালিত নাৱেৰে ব্ৰক্ষ্মপুত্ৰৰ এটা দুৰ্গম চৰাঞ্চললৈ লৈ যায় অভিযুক্ত অপহৰণকাৰী যুৱক দুজনে ৷
আৰক্ষীয়ে দুয়োজন আটকাধীন যুৱকক জেৰা আৰম্ভ কৰিছে যদিও ব্যৱসায়ীজনৰ কোনো সন্ধান লাভ কৰিবলৈ সক্ষম হোৱা নাই৷ উল্লেখযোগ্য যে ব্যৱসায়ী যুৱকজনৰ লগত পাচঁ লাখ টকা আছিল বুলি তেওৰ পৰিয়ালে এজাহাৰত উল্লেখ কৰিছিল, সেই টকা লুট কৰি নিয়াৰ বাবেই অপহৰণ কৰাৰ সন্দেহ প্ৰকাশ স্থানীয় ৰাইজৰ ৷
