নিউজ ডেস্ক, 2 জুলাই : প্ৰতিজন লোকৰে জীৱনত বাজেটে অত্যাৱশ্যকীয় ভূমিকা পালন কৰে ৷ ব্যক্তিগত প্ৰয়োজনৰ পৰা আৰম্ভ কৰি পেশাদাৰী ক্ষেত্ৰতো বাজেটে অতীজৰে পৰা গুৰুত্বপূৰ্ণ ভূমিকা গ্ৰহণ কৰি আহিছে ৷ উল্লেখ্য যে, বাজেট শব্দটো ফৰাছী শব্দ 'বগেট'ৰ পৰা আহিছে আৰু ইয়াৰ অৰ্থ হৈছে চামৰাৰ বেগ ৷ 1860 চনৰ সময়ত ব্ৰিটিছ চেঞ্চেলৰ উইলিয়াম ইৱাৰ্ট গ্লেডষ্টনে ৰঙা ৰঙৰ এটা ছুটকেচ লগত লৈ ফুৰিছিল আৰু এই ছুটকেচটোক ৰঙা বাকচ অথবা বাজেট বাকচ বুলি সকলোৱে কৈছিল ৷
বাজেটৰ ইতিহাস সম্পৰ্কে জানিবলগীয়া কিছু কথা : বাজেট ইতিহাসৰ প্ৰথম খন বাজেট ব্ৰিটিছ চৰকাৰে 1860 চনত ইংৰাজী ভাষাত উত্থাপন কৰিছিল ৷ এই বাজেট উত্থাপনৰ সকলো গুৰুদ্বায়িত্ব বহন কৰিছিল সেই সময়ৰ বিত্ত মন্ত্ৰী জেমছ উইলচনে ৷ ব্ৰিটিছ চৰকাৰৰ তত্বাৱধানত কৰ আদায়ৰ সুবিধাৰ্থে বিয়লি 5 বজাত বাজেট খন উত্থাপন কৰা হৈছিল ৷ বিয়লি বাজেট উত্থাপনে কৰ সংগ্ৰহকাৰী সংস্থাসমূহক বিভিন্ন ক্ষেত্ৰত সালসলনি কৰাত সহায় কৰিছিল ৷
ভাৰততো স্বাধীনতাৰ পূৰ্বে অৰ্থাৎ 1946 চনৰ 9 অক্টোবৰৰ পৰা 1947 চনৰ 14 আগষ্টলৈকে অন্তৱৰ্তীকালীন বাজেট উত্থাপন কৰিছিল লিয়াকত আলি খানে ৷ ভাৰতে স্বাধীনতা লাভৰ পাছত প্ৰথম বাৰৰ বাবে 1947 চনৰ 26 নৱেম্বৰ তাৰিখে আৰ কে ছানমুখাম ছেত্ৰীয়ে অন্তৱৰ্তীকালীন বাজেট উত্থাপন কৰিছিল ৷ উল্লেখনীয় যে, ভাৰতীয় সংবিধানত বৰ্তমান পৰ্যন্ত 'বাজেট' শব্দটোৰ উল্লেখ কৰা হোৱা নাই ৷ সংবিধানৰ 112 অনুচ্ছেদত কেৱল 'বছৰেকীয়া বিত্তীয় বিল' বুলিহে ইয়াৰ উল্লেখ আছে ৷ ছেত্ৰীৰ পাছত জন মাথাই হৈছে দ্বিতীয় জন বিত্ত মন্ত্ৰী আৰু তেওঁ 1949 - 50 বৰ্ষৰ বাজেট উত্থাপন কৰিছিল ৷ মাথাইয়ে পঞ্চ বাৰ্ষিক পৰিকল্পনা আঁচনিৰ বিষয়ে বাজেটত আলোচনা আগবঢ়াইছিল ৷
1958 চনত জৱাহৰলাল নেহৰুৱে প্ৰথম জন প্ৰধানমন্ত্ৰী হিচাপে বাজেট উত্থাপন কৰিছিল ৷ 1955 - 56 বিত্তীয় বৰ্ষত বাজেট সমূহ ৰাষ্ট্ৰীয় ভাষা হিন্দীত লিখাৰ ব্যৱস্থা কৰা হৈছিল ৷ 1964 আৰু 1968 ত মোৰাৰজী দেশাইৰ জন্মদিনৰ দিনা তেওঁ সাধাৰণ বাজেট উত্থাপন কৰিছিল ৷ জন্মদিনত বাজেট উত্থাপন কৰা প্ৰথম গৰাকী প্ৰধানমন্ত্ৰী হিচাপে পৰিচিত হৈছিল দেশাই ৷ তেওঁৰ পদত্যাগৰ পাছত 1970 চনত ইন্দিৰা গান্ধীয়ে প্ৰথম গৰাকী মহিলা প্ৰধানমন্ত্ৰী হিচাপে বাজেট উত্থাপন কৰে ৷ 2001 চনত এন ডি এ চৰকাৰে প্ৰথম বাৰৰ বাবে পুৱা 11 বজাত বাজেট উত্থাপন কৰি কিছু ব্যতিক্ৰম অনাৰ চেষ্টা কৰিছিল ৷ ইয়াৰ জৰিয়তে পুৱা ভাগত বাজেট উত্থাপন কৰা প্ৰথম গৰাকী বিত্ত মন্ত্ৰী হিচাপে পৰিচিত হয় য়শবন্ত সিন্হা ৷ 2016 চনত মোডী চৰকাৰে বাজেট উত্থাপনৰ ক্ষেত্ৰত এক বৃহৎ সালসলনি কৰিছিল ৷ তেওঁ বাজেট উত্থাপনৰ দিনটো 28 ফেব্ৰুৱাৰীৰ পৰিৱৰ্তে 1 ফেব্ৰুৱাৰী কৰিছিল ৷
