নিউজ ডেস্ক, 3 ফেব্ৰুৱাৰীঃ কেন্দ্ৰই ৰাজ্যসমূহক দুটাকৈ ইনষ্টলমেন্টৰ দ্বাৰা জিএছটি ক্ষতিপূৰণ প্ৰদান কৰিব ৷ সোমবাৰে লোকসভাৰ প্ৰশ্নোত্তৰ শিতানত কেন্দ্ৰীয় মন্ত্ৰী অনুৰাগ ঠাকুৰে এই কথা উল্লেখ কৰে ৷ তেলেংগানা আৰু উৰিষ্যাৰ সাংসদে, তেওঁলোকৰ ৰাজ্যদুখনে সামগ্ৰী আৰু সেৱা কৰ তথা সংহত সামগ্ৰী আৰু সেৱা কৰৰ লাভাংশ ঠিকমতে লাভ কৰা নাই বুলি উত্থাপন কৰা প্ৰশ্নৰ উত্তৰত এই কথা উল্লেখ কৰে মন্ত্ৰী অনুৰাগ ঠাকুৰে ৷ কেন্দ্ৰীয় বিত্ত ৰাজ্যিক মন্ত্ৰীগৰাকীয়ে কয় যে, "সকলো বাকী থকা জিএছটি ক্ষতিপূৰণ ৰাজ্যসমূহক দুটাকৈ খণ্ডত প্ৰদান কৰা হ'ব ৷ জিএছটি (ৰাজ্যসমূহলৈ ক্ষতিপূৰণ) আইন, 2017 অনুসৰি, ৰাজ্য় তথা কেন্দ্ৰীয়শাসিত অঞ্চল (বিধানমণ্ডলৰ সৈতে কেন্দ্ৰীয় শাসিত অঞ্চল)সমূহক জিএছটিৰ বাবে সন্মুখীন হোৱা ৰাজহ লোকচানৰ বাবে মাহত দুবাৰকৈ ক্ষতিপূৰণ দিয়াৰ ব্যৱস্থা কৰা হৈছে ৷"
তেওঁ লগতে উল্লেখ কৰে যে, ৰাজ্যসমূহক এইদৰে ক্ষতিপূৰণ দিয়াৰ ব্যৱস্থা 2017 চনৰ জুলাই মাহৰ পৰাই কাৰ্যকৰী কৰা হৈছে ৷ ইতিমধ্যে 2019 বৰ্ষৰ ছেপ্টেম্বৰ মাহলৈ জিএছটি ক্ষতিপূৰণসমূহ মুকলি কৰি দিয়া হৈছে আৰু অক্টোৱৰ তথা নৱেম্বৰ মাহৰ ক্ষতিপূৰণসমূহ বাকী আছে ৷ 2017 চনৰ জুলাই 1 তাৰিখৰ পৰা কাৰ্যকৰী হোৱা সামগ্ৰী আৰু সেৱা কৰৰ অধীনত ৰাজ্যসমূহৰ লগতে দিল্লী আৰু পণ্ডিচেৰী কেন্দ্ৰীয়শাসিত অঞ্চলক ধৰি সৰ্বমুঠ 2,10,969.49 কোটি টকা ক্ষতিপূৰণ প্ৰদান কৰা হৈছে ৷ ইয়াৰ ভিতৰত 2017ৰ জুলাইৰ পৰা 2018ৰ মাৰ্চলৈ 48,785.35 কোটি টকা, 2018 এপ্ৰিলৰ পৰা 2019ৰ মাৰ্চলৈ 81,141.14 কোটি টকা, 2019ৰ এপ্ৰিল আৰু মে' মাহত 17,789 কোটি, 2019ৰ জুন আৰু জুলাই মাহত 27,956 কোটি টকা আৰু আগষ্টৰ পৰা ছেপ্টেম্বৰ মাহত সৰ্বমুঠ 35,298 কোটি টকা মুকলি কৰি দিছে কেন্দ্ৰই ৷
