গোলাঘাট,৩১মে' : শুকুৰবাৰে সৰ্ববৃহৎ সুৰা ট্ৰেজেডী ঘটনাৰ শুনানিৰ দিন ধাৰ্য কৰে গোলাঘাট আদালতে । ১১ জুনত এই গোচৰৰ শুনানিৰ দিন ধাৰ্য কৰে আদালতে । এহেজাৰৰো অধিক পৃষ্ঠাৰ এই অভিযোগনামাত মুঠ ৪১ জনৰ বিৰুদ্ধে অভিযোগ দাখিল কৰাৰ লগতে ৬৫ জনৰ নাম উল্লেখ কৰা হয় সাক্ষী হিচাপে ।
উল্লেখযোগ্য যে, ফেব্ৰুৱাৰী মাহত বিষাক্ত সুৰা সেৱন কৰি গোলাঘাট জিলাত ৭০ জনৰো অধিক লোকৰ মৃত্যু হৈছিল । এই সমগ্ৰ ঘটনাৰ তদন্ত কৰি ৯০ দিনৰ ভিতৰত আদালতত অভিযোগনামা দাখিল কৰাৰ নিৰ্দেশ দিছিল অসম চৰকাৰে । সেই অনুসৰি গোলাঘাট আৰক্ষীয়ে জিলাখনৰ শালমৰা চাহ বাগিচাৰ লগতে বিষাক্ত সুৰা সেৱন কৰি মৃত্যু হোৱা অঞ্চল কেইটাৰ তদন্ত কৰি প্ৰতিবেদন প্ৰস্তুত কৰে । সুৰা, লালি গুড়, বিষাক্ত মিঠানেল আদি বিক্ৰী কৰা মুঠ ৪৫ জনক গ্ৰেপ্তাৰ কৰি জেললৈ চালান দিছিল গোলাঘাট আৰক্ষীয়ে । অৱশ্যে বিভিন্ন দল-সংগঠনে লালি গুড়ৰ মূল মাফিয়া লালচৰন আগৰৱালা আৰু অনিল গুপ্তাক গ্ৰেপ্তাৰৰ দাবী জনাই আহিছিল যদিও আৰক্ষীয়ে অভিযুক্তক বৰ্তমানেও ৰক্ষণাবেক্ষণ দি অহাৰ অভিযোগ উথাপন হৈছে ।
