ডিফু, ৯ জুলাইঃ ক'ভিড ১৯ত আক্ৰান্ত হৈ বৃহস্পতিবাৰে গুৱাহাটী মেডিকেল কলেজ হাস্পতালত শেষ নিশ্বাস ত্যাগ কৰে কাৰ্বি আংলং স্বায়ত্তশাসিত পৰিষদৰ কৃষি বিভাগৰ এগৰাকী বিষয়াই । মৃত ৰামছিং হাঞ্চে নামৰ বিষয়াগৰাকী বিভাগটোৰ ভাৰপ্ৰাপ্ত অতিৰিক্ত সঞ্চালক হিচাপে কৰ্মৰত আছিল ৷ কাৰ্বি আংলং স্বায়ত্তশাসিত পৰিষদৰ স্বাস্থ্য বিভাগৰ কাৰ্যবাহী সদস্য খনছিং ৰংপি কৰ'ণাত আক্ৰান্ত হোৱাৰ পিছতে জিলাখনত কৃষি বিভাগৰ অভিযন্তা তথা বিভাগটোৰ অতিৰিক্ত সঞ্চালক ৰামছিং হাঞ্চে কোভিড-১৯ আক্ৰান্ত হোৱাৰ কথা পোহৰলৈ আহিছিল ৷
উল্লেখ্য যে, যোৱা কিছুদিন ধৰি জ্বৰ, চৰ্দি, কাঁহ আদিত আক্ৰান্ত হৈ থকা কৃষি বিভাগৰ জ্যেষ্ঠ বিষয়া গৰাকীয়ে ডিফু চিকিৎসা মহাবিদ্যালয়ত চিকিৎসাধীন হৈ আছিল ৷ ইয়াৰ মাজতে যোৱা ৪ জুলাইত বিষয়াগৰাকী গুৰুতৰ বাবে অসুস্থ হৈ পৰিছিল আৰু ৫ জুলাইত তেখেতৰ স্বাৱ টেষ্টৰ ফলাফল পজিটিভ পোৱা গৈছিল ৷ বিষয়া গৰাকীৰ স্বাস্থ্যৰ অৱস্থা অধিক অৱণতি ঘটাত উন্নত চিকিৎসাৰ বাবে গুৱাহাটীলৈ প্ৰেৰণ কৰা হৈছিল ৷ ৰামছিং হাঞ্চেক গুৱাহাটী চিকিৎসা মহাবিদ্যালয়ত ভৰ্তি কৰোৱাৰ পিছত শ্বাস- প্ৰশ্বাসত ভুগি বৃহস্পতিবাৰে পুৱা ১০ বজাত মৃত্যুক আকোঁৱালি লয় ৷
আনহাতে, আজি পুৱাৰ ভাগত প্ৰাপ্ত তথ্য অনুসৰি জিলাখনৰ ১৬ বছৰৰ অনুৰ্ধৰ ৫ জনকৈ শিশু আৰু এজন ৫৬ বছৰীয়া লোক কৰ'ণা ভাইৰাছত আক্ৰান্ত হোৱাৰ বাতৰি পোৱা গৈছে।
