গোলাঘাট,২১মে' : গোলাঘাট জিলাৰ শ্ৰীমন্ত নগৰৰ এগৰাকী বিশেষ মহিলাই দাঙি ধৰিছে স্বাৱলম্বীতাৰ এক উৎকৃষ্ট নিদৰ্শন । ঘৰৰ এটা চুকতে বৃহৎ পৰিমাণৰ এৰী পলু প্ৰতিপালন কৰি স্বাৱলম্বী হৈছে গোলাঘাটৰ পুতলি বৰাই । প্ৰায় ২ কিলোগ্ৰাম এৰী পলুৰ প্ৰতিপালন কৰা পুতলীৰ একমাত্ৰ উপাৰ্জনৰ পথ এতিয়া এই এৰী পলু । ইফালে, প্ৰতি কিলোগ্ৰাম পলুত ৪০০ টকাকৈ বিক্ৰী কৰাৰ লগতে খাদ্যৰ বাবে ব্যৱহাৰ কৰা লেটা পোক আৰু পলুৱে সজা বাঁহটোও ঘৰৰ পৰাই সুলভ মূল্যত বিক্ৰী কৰে বুলি মন্তব্য কৰে পুতলীয়ে । পুতলীৰ এই পদক্ষেপ এতিয়া আন মহিলাসকলৰ বাবেও স্বাৱলম্বীতাৰ এক নতুন নিদৰ্শন হৈ পৰিছে ।
কিন্তু অসম চৰকাৰৰ সংশ্লিষ্ট বিভাগটোৰ অকৰ্মণ্য স্বভাৱৰ বাবেই আজিও পুতলী বৰাৰ দৰে সঁচা অৰ্থত কাম কৰি বয়ন শিল্পক আগুৱাই নিব বিচৰা উৎপাদনমূলক কাম-কাজবোৰ আৰ্থিক অভাৱৰ বাবে সমাজৰ পৰা নাইকিয়া হ'ব ধৰিছে । যাৰ বাবে সমাজৰ পৰা লুপ্ত হ'বলৈ লৈছে এৰী,মুগাৰ দৰে বহু অসম গৌৰৱ সামগ্ৰী ।
