শিৱসাগৰ,২৭ এপ্ৰিল : শুকুৰবাৰে কলিয়াবৰ আৰক্ষী থানাৰ অন্তৰ্গত বুঢ়াপাহাৰত সংঘটিত হোৱা ভয়ংকৰ পথ দুৰ্ঘটনাত নিহত হৈছিল ডা: সুমিত কুমাৰ গাৰোডিয়া আৰু পত্নী নন্দিনী গাৰোডিয়াৰ । শনিবাৰে সুমিতৰ লগতে তেওঁৰ পত্নী নন্দিনীৰ মৃতদেহ লৈ অনা হয় দীৰ্ঘদিন ধৰি কৰ্মৰত ভূমি শিৱসাগৰলৈ । ডা: সুমিত কুমাৰ গাৰোডিয়াই সাত বছৰ ধৰি শিৱসাগৰ অসামৰিক চিকিৎসালয়ত চিকিৎসক হিচাপে কৰ্মৰত আছিল । চিকিৎসকজনৰ অকাল মৃত্যুত এতিয়া শোকাকুল পৰিৱেশৰ সৃষ্টি হৈছে সমগ্ৰ শিৱসাগৰ জিলাত । চিকিৎসকজনৰ আত্মাৰ সদগতিৰ বাবে নগৰৰ আশীৰ্বাদ ভৱনত শিৱসাগৰ জিলাৰ ৰাইজে শেষ শ্ৰদ্ধা জ্ঞাপন কৰে চিকিৎসকজনৰ লগতে তেওঁৰ পত্নীক ।
উল্লেখযোগ্য যে, আত্মীয়ৰ বিবাহ অনুষ্ঠানত অংশ লবলৈ হোজাইলৈ গৈ থকা অৱস্থাতে বুঢ়াপাহাৰত চিকিৎসকজনৰ হোণ্ডা ব্ৰিঅ’ বাহনখন দুৰ্ঘটনাত পতিত হৈছিল । ট্ৰেভেলাৰৰে মুখামুখি সংঘৰ্ষত থিতাতে নিহত হৈছিল চিকিৎসক সুমিতৰ লগতে তেওঁৰ পত্নী আৰু গুৰুতৰভাৱে আহত হৈছিল সুমিতৰ দুই পুত্ৰৰ । সম্প্ৰতি গুৱাহাটীত চিকিৎসাধীন অৱস্থাত আছে গুৰুতৰভাৱে আহত দুই পুত্ৰ ।
