নেশ্যনেল ডেস্ক, ৪ জুন: ইউনিভাৰ্ছিটি অৱ ব্ৰিমিংঘাম আৰু অক্সফ'ৰ্ডে কোভিড-১৯ হাস্পতালত চিকিৎসা প্ৰদান কৰা কৰ্কট ৰোগীৰ মৃত্যুৰ কাৰণ উলিয়াবলৈ এক গৱেষণা সম্পন্ন কৰে । UK Coronavirus Cancer Monitoring Project (UKCCMP)য়ে এই গৱেষণাৰ নেতৃত্ব বহন কৰে আৰু এই সমিতিয়ে মাৰ্চ মাহত গৱেষণা আৰম্ভ কৰি ইংলেণ্ডৰ কোভিড-১৯ত আক্ৰান্ত কৰ্কট ৰোগীসকলৰ সমীক্ষা চলায় ।
কেম'অথেৰাপী বা অন্যান্য কৰ্কট চিকিৎসা যেনে ৰেডিঅ'থেৰাপী, ইমিউন'থেৰাপী অথবা হৰমনথেৰাপীয়ে কৰ্কট ৰোগীসকলৰ মৃত্যুৰ হাৰত কিদৰে প্ৰভাৱ পেলায় তাৰ মূল্যাংকণ কৰিবলৈ এই পৰিকল্পনা হাতত লোৱা বুলি জানিব পৰা গৈছে । ইয়াৰোপৰি, প্ৰতিখন স্থানীয় হাস্পতালৰ কৰ্কট চিকিৎসকক এই গৱেষণাত ভাগ ল'বলৈ দি ৰোগীসকলৰ সঁচাকৈয়ে মৃত্যু হৈছেনে নাই,নে তেওঁলোকক অসুস্থভাৱে হাস্পতালৰ পৰা যাবলৈ দিয়া হৈছে,ৰোগীসকলৰ বয়স,লিংগ আদি সকলোতে গুৰুত্ব প্ৰদান কৰে গৱেষকসকলে ।
ইংলেণ্ডৰ মুঠ ৫৫ টা কৰ্কট কেন্দ্ৰত সূচনা জাৰি কৰে UKCCMPয়ে । প্ৰথমতে ৮০০ জন কোভিড-১৯ত আক্ৰান্ত কৰ্কট ৰোগীৰ বিশ্লেষণ দাঙি ধৰে তেওঁলোকে । ৮০০ জন ৰোগীৰ ভিতৰত ১৬৯ জনৰ ক্ষেত্ৰত গম পোৱা গৈছে যে, তেওঁলোকৰ কৰ্কট ৰোগৰ বাহিৰে আন একো বেমাৰ নাই । বাকী ৬৩১ জন ৰোগীৰ দেহত কৰ্কট ৰোগৰ উপৰিও উচ্চ ৰক্তচাপ, মধুমেহ,হৃদৰোগ আদিও আছে বুলি সংস্থাটোৱে সদৰী কৰে ।
লগতে পঢ়ক: বানৰ কবলত পুৰণিগুদামৰ বিস্তীৰ্ণ অঞ্চল
