নেশ্যনেল ডেস্ক,২৪ ফেব্ৰুৱাৰী : অন্ধ্ৰপ্ৰদেশৰ কুৰ্ণুলত চাঞ্চল্যকৰ ঘটনা (Kurnul murder case)। প্ৰেমিকাৰ নগ্ন ভিডিঅ' চুৰি কৰি মানসিক অত্যাচাৰ চলোৱাক বন্ধুক হত্যা কৰিলে এজনে । প্ৰেমিকাৰো আত্মহত্যাৰ চেষ্টা । সংকটজনক অৱস্থাত হাস্পতালত ভৰ্তি প্ৰেমিকাক ।
অন্ধ্ৰ প্ৰদেশৰ কুৰ্ণুল মণ্ডলৰ বালাজীনগৰত সংঘটিত হৈছে এই ঘটনা । আৰক্ষীয়ে জনোৱা মতে, কুৰ্ণুল মণ্ডলৰ বালাজীনগৰৰ বাসিন্দা এৰুকালী দিনেশে স্নাতকৰ ছাত্ৰ । তেওঁৰ এজন ঘনিষ্ঠ বন্ধু আছিল যাৰ নাম মালেপোগু মুৰলীকৃষ্ণ । মুৰলীকৃষ্ণ এজন ফুল ডেক'ৰেটৰ । দিনেশে প্ৰেমিকাৰ কিছুমান নগ্ন ভিডিঅ' তেওঁৰ ফোনত ৰাখিছিল । এদিন মুৰলীকৃষ্ণই সেই ভিডিঅ'বোৰ দেখিছিল । লগে লগে মুৰলীকৃষ্ণই সেইবোৰ ভিডিঅ' তেওঁৰ নিজৰ ফোনত লৈছিল ।
ভিডিঅ'বোৰ লৈ মুৰলীকৃষ্ণই দিনেশৰ প্ৰেমিকাক ফোন কৰে আৰু সেই নগ্ন ভিডিঅ'বোৰৰ নামত যুৱতীগৰাকীক হাৰাশাস্তি কৰিবলৈ আৰম্ভ কৰে । মুৰলীকৃষ্ণই যুৱতীগৰাকীৰ ভিডিঅ'বোৰ পৰিয়ালৰ সদস্য আৰু আত্মীয়সকললৈ প্ৰেৰণ কৰাৰো ভাবুকি প্ৰদান কৰে (Harassment of friends girlfriend)।
অৱশ্যে সেয়া নকৰিবলৈ দিনেশৰ প্ৰেমিকাই মুৰলীকৃষ্ণক অনুৰোধ জনালে ; কিন্তু তাৰ পাছতো তেওঁৰ ওপৰত মানসিক নিৰ্যাতন অব্যাহত ৰাখিলে । অধিক নিৰ্যাতন সহ্য কৰিব নোৱাৰি, যুৱতীগৰাকীয়ে শেহতীয়াকৈ আত্মহত্যাৰ চেষ্টা কৰে । সম্প্ৰতি যুৱতীগৰাকী চিকিৎসালয়ত ভৰ্তি হৈ আছে ।
ইফালে বন্ধুৱে এনেদৰে প্ৰেমিকাক কৰা মানসিক নিৰ্যাতনৰ কথা গম পাই ক্ষোভিত হৈ পৰে দিনেশ । দিনেশে মুৰলীকৃষ্ণৰ বিৰুদ্ধে ব্যৱস্থা গ্ৰহণৰ সিদ্ধান্ত লয় । দিনেশে মুৰলীকৃষ্ণক হত্যা কৰাৰ এক পৰিকল্পনা কৰে । দিনেশে বন্ধু মুৰলীকৃষ্ণক হত্যাৰ পৰিকল্পনাটো কিৰণ কুমাৰ নামৰ আন এজন বন্ধুৰ সৈতে কৰিছিল । যোৱা ২৫ জানুৱাৰীত, দিনেশ আৰু কিৰণ কুমাৰে বন্ধু মুৰলীকৃষ্ণক এখন বাইকত চহৰৰ উপকণ্ঠৰ পাঞ্চালিঙ্গলা অঞ্চললৈ লৈ যায় আৰু তাত মুৰলীকৃষ্ণক চুৰিৰে হত্যা কৰে (Murder of friend who harasses girlfriend)।
ইয়াৰ পাছতে এখন অটো ৰিক্সা ভাড়া কৰি বন্ধু দুজনে মুৰলীকৃষ্ণৰ মৃতদেহটো নানুৰু টোল প্লাজাৰ ওচৰৰ এইচএনএছএছ খাৱৈত পেলাই দিয়ে । ইফালে হত্যাকাৰী দুই বন্ধুৱে মুৰলীকৃষ্ণৰ ম'বাইল ফোন আৰু কাপোৰ বিভিন্ন ঠাইত পেলাই দিয়ে । ইফালে মুৰলীকৃষ্ণ সন্ধানহীন হোৱাক লৈ পিতৃ-মাতৃয়ে কুৰ্ণুল আৰক্ষী থানাত এজাহাৰ দাখিল কৰে । চলিত মাহৰ ১৬ তাৰিখে এজাহাৰ দাখিল কৰাৰ পাছতে আৰক্ষীয়ে মুৰলীৰ বন্ধু দিনেশক সোধা-পোছা কৰে । জেৰাৰ অন্তত সমগ্ৰ ঘটনাৰ কথা স্বীকাৰ কৰে দিনেশে । দিনেশৰ স্বীকাৰোক্তিৰ ভিত্তিত আৰক্ষীয়ে খাৱৈত মুৰলীকৃষ্ণৰ মৃতদেহ বিচাৰি অনুসন্ধান আৰম্ভ কৰিছে ।
লগতে পঢ়ক :Two Rape cases: বাইহাটাত গাঁওবুঢ়াৰ হাতত ধৰ্ষিতা মহিলা; গোলাঘাটত কিশোৰীক দলবদ্ধ ধৰ্ষণ
