নিউজ ডেস্ক, 19 অক্টোবৰ: সুদীৰ্ঘ ২৪ বছৰৰ পাছত নিখিল ভাৰত কংগ্ৰেছ কমিটিৰ সভাপতিৰ বাবে অনুষ্ঠিত হৈছে ভোটদান (Congress new president) । বুধবাৰে ঘোষণা হ'ব এআইচিচিৰ সভাপতিৰ নাম । পুৱা ১০ বজাৰ পৰা আৰম্ভ হৈছে সভাপতি পদৰ নিৰ্বাচনৰ ভোটগণনা(Congress presidential election vote counting) ৷
কিন্তু ভোটগণনা প্ৰক্ৰিয়াৰ মাজতে কংগ্ৰেছৰ সভাপতি পদৰ প্ৰাৰ্থী মল্লিকাৰ্জুন খাৰ্গেৰ বিৰুদ্ধে উত্থাপিত হৈছে ভোটদানৰ নিয়ম উলংঘনৰ অভিযোগ ৷ কংগ্ৰেছৰ সভাপতি পদৰ প্ৰাৰ্থী মল্লিকাৰ্জুন খাৰ্গেৰ বিৰুদ্ধে এই অভিযোগ কৰিছে তেওঁৰেই প্ৰতিদ্বন্দী তথা কংগ্ৰেছ নেতা শশী থাৰুৰৰ শিবিৰে(Shashi Tharoor allegation on cong counting) ৷
শশী থাৰুৰৰ নিৰ্বাচনী এজেণ্ট ছলমান ছোজেয়ে মল্লিকাৰ্জুন খাৰ্গেৰ বিৰুদ্ধে ভোটদানৰ নিয়ম উলংঘন কৰাৰ অভিযোগ কৰে । ছলমান ছোজেয়ে কয়, "আমি কেন্দ্ৰীয় নিৰ্বাচন কৰ্তৃপক্ষলৈ প্ৰেম পত্ৰ লিখা নাই ৷ আমি বিষয়টোৰ একেবাৰেই ভিতৰতো সোমাব নিবিচাৰো, কিয়নো ই এটা আভ্যন্তৰীণ বিষয় আৰু সেয়া অনুচিত হ'ব ৷ কিন্তু আমি আমাৰ উদ্বেগ প্ৰকাশ কৰাৰ বাবে দলটোৰ কেন্দ্ৰীয় নিৰ্বাচন কৰ্তৃপক্ষৰ (চিইএ) সৈতে নিৰন্তৰ যোগাযোগ কৰি আছো ।"
সূত্ৰ অনুসৰি, শশী থাৰুৰে দুয়োজন প্ৰাৰ্থীকে সম সুবিধা নিদিয়াৰ অভিযোগ কৰিছে । কংগ্ৰেছৰ নিৰ্বাচনী কাৰ্যালয়ে বিষয়াসকলক যিকোনো প্ৰাৰ্থীৰ হৈ প্ৰচাৰ চলাবলৈ বাধা দিছিল । কিন্তু কিছুমান স্থানত, কাৰ্যালয়ৰ বিষয়াসকলে মুকলিকৈ খাৰ্গেক সমৰ্থনত নিৰ্বাচনী প্ৰচাৰ কৰিছিল যিটোক লৈ থাৰুৰে আপত্তি কৰিছিল ।
উল্লেখ্য যে, কংগ্ৰেছ দলটোৱে বিগত প্ৰায় দুই দশকতকৈও অধিক সময় দলটোৰ নেতৃত্ব বহন কৰাৰ পাছত শীৰ্ষ পদত এজন অ-গান্ধীক প্ৰত্যক্ষ কৰিবলৈ সাজু হৈছে । ভোট গণনাৰ আগতে, এক নিৰপেক্ষ প্ৰক্ৰিয়া নিশ্চিত কৰিবলৈ সকলো ৰাজ্যৰ সকলো বেলট পেপাৰ একত্ৰিত কৰা হৈছিল । 1998 চনৰ পৰা, ছোনিয়া গান্ধী সভাপতি হৈ আছে ৷
আনহাতে ৰাহুল গান্ধীয়ে কিছু সময়ৰ বাবে সভাপতি পদটো দখল কৰিছিল আৰু 2019 চনৰ লোকসভা নিৰ্বাচনৰ বিপৰ্যয়ৰ পিছত পদত্যাগ কৰিছিল । নতুন সভাপতিৰ সন্মুখত প্ৰথম প্ৰত্যাহ্বান হ'ব ৰাজস্থান কংগ্ৰেছত চলি থকা ৰাজনৈতিক বিবাদ সমাধান কৰা ।
লগতে পঢ়ক: Congress President Elections Results: কংগ্ৰেছৰ নতুন সভাপতি মল্লিকাৰ্জুন খাৰ্গে
