নেশ্যনেল ডেস্ক, 17 জুন : প্ৰতিষেধক প্ৰদান কৰিবলৈ গৈ কাশ্মীৰৰ বান্দিপোৰাত আক্ৰমণৰ বলি হ'ল প্ৰতিষেধক প্ৰদানকাৰীৰ দল ৷ ঘটনা অনুসৰি, স্বাস্থ্যকৰ্মীৰ এটা দলে উত্তৰ কাশ্মীৰৰ বান্দিপোৰা জিলাৰ ফাৰ-ফুং গাঁৱৰ এটা পৰিয়ালক প্ৰতিষেধক প্ৰদানৰ বাবে উপস্থিত হোৱাৰ লগে লগে প্ৰতিষেধক গ্ৰহণৰ বাবে অমান্তি হোৱাৰ লগতে স্বাস্থ্যকৰ্মীৰ দলটোক উপৰ্যুপৰি আক্ৰমণ কৰে ৷ সম্প্ৰতি সমগ্ৰ ঘটনাৰ ভিডিঅ' সামাজিক মাধ্যমত ভাইৰেল হৈ পৰিছে ৷
ঘটনাস্থলীত উপস্থিত হোৱা এগৰাকী বিষয়াই ইটিভি ভাৰতক জনোৱা মতে, পৰিয়ালটোৱে অপ্ৰচাৰৰ বশৱৰ্তী হৈ এই কাণ্ড সংঘটিত কৰিছে ৷ স্বাস্থ্যকৰ্মীৰ দলটোৱে পৰিয়ালটোক প্ৰতিষেধক প্ৰদানৰ বাবে চেষ্টা কৰিছিল যদিও পৰিয়ালৰ সদস্যসকলে অমান্তি হৈ কয় যে, স্বাস্থ্য বিভাগে নিজৰ মুনাফা লাভৰ বাবে এই কাৰ্যসূচী হাতত লৈছে ৷
ইফালে, একেসময়তে জিলা উপায়ুক্ত ড৹ ওৱেচিচ ঘটনাস্থলীত উপস্থিত হৈ পৰিস্থিতিৰ বুজ লোৱাৰ লগতে ঘটনা সন্দৰ্ভত তদন্ত কৰাৰ নিৰ্দেশ প্ৰেৰণ কৰিছে ৷ সম্প্ৰতি বান্দিপোৰা আৰক্ষীয়ে ঘটনাৰ লগত জড়িত তনবীৰ আহমদ খান নামৰ এজন লোকক আটক কৰি সোধ-পোছ অব্যাহত ৰাখিছে ৷
লগতে পঢ়ক: RedFoxtrotৰ চাইবাৰ অনুপ্ৰৱেশৰ জৰিয়তে চীনা সেনাৰ টাৰ্গেটত ভাৰত
