নেশ্যনেল ডেস্ক,২৫ ফেব্ৰুৱাৰী : উত্তৰ প্ৰদেশত বিধানসভা নিৰ্বাচনৰ (UP assembly election 2022) ইতিমধ্যে ৪টা পৰ্যায়ৰ ভোটগ্ৰহণ সম্পন্ন হৈছে । ২৭ ফেব্ৰুৱাৰীত অনুষ্ঠিত হ'ব পঞ্চম পৰ্যায়ৰ ভোটগ্ৰহণ । এই পৰ্যায়ত অনুষ্ঠিত হ'বলগীয়া নিৰ্বাচনত কেইবাটাও সমষ্টি অতি গুৰুত্বপূৰ্ণ হিচাপে বিবেচিত হৈছে । তাৰ ভিতৰত অন্যতম হৈছে আমেঠি সমষ্টি । আমেঠি জিলাৰ অধীনত চাৰিটা বিধানসভা সমষ্টি আছে । তাৰ ভিতৰত গৌৰীগঞ্জ, তিলোই, জগদীশপুৰ (সংৰক্ষিত) আৰু আমেঠি । ইয়াৰে আমেঠি সমষ্টিয়ে বৰ্তমান বিশেষ চৰ্চা লাভ কৰিছে । ২০১৭ চনত আমেঠি সমষ্টি বিজেপিয়ে দখল কৰিছিল ।
এইবাৰ সমষ্টিটোৰ ভাৰতীয় জাতীয় কংগ্ৰেছৰ প্ৰাৰ্থী আশীষ শুক্লা, বিজেপিৰ সঞ্জয় সিং, এছপিৰ পৰা মহাৰাজী প্ৰজাপতি, বিএছপিৰ ৰাগিণী তিৱাৰী আৰু আপৰ পৰা প্ৰতিদ্বন্দিতা আগবঢ়াইছে অনুৰাগ দিক্সিতে । কিন্তু কোনে শেষ হাঁহি মাৰিব পাৰিব এই সমষ্টিত ? সেয়া নিৰ্ভৰ কৰিব কৃষক সমাজৰ ওপৰত । কাৰণ আমেঠি সমষ্টিৰ অধিকাংশ লোকেই প্ৰধানকৈ কৃষি কাৰ্যৰ লগত জড়িত (Amethi constituency depend mostly on farming ) ।
কৃষি তেওঁলোকৰ উপাৰ্জনৰ প্ৰধান উৎস । লক্ষণীয়ভাৱে নিৰ্বাচন অহাৰ লগে লগে এই সমষ্টিটো চৰ্চাত আহিছে । কিয়নো বিভিন্ন সমস্যাৰে জৰ্জৰিত এই আমেঠি সমষ্টিটো । কৃষি প্ৰধান অঞ্চলৰ ৰাইজে সন্মুখীন হৈ অহা সমস্যাৰ ভিতৰত অন্যতম হৈছে সাৰৰ নাটনি ।
কৃষকসকলক কৃষি কাৰ্যত ব্যৱহৃত সাৰ যোগান ধৰাত ব্যৰ্থ হৈছে চৰকাৰ । আমেঠি খণ্ড কাৰ্যালয়ত চৰকাৰে যোগান ধৰা সাৰৰ বাবে ১.৫ কি:মি: পৰ্যন্ত শাৰী পাতিবলগীয়া হয় কৃষকসকলে । কিন্তু তাৰ ভিতৰত সকলোৱে সাৰ পাব নে নাই সেয়াও নিশ্চিত নহয় । সাৰ কেন্দ্ৰৰ অভাৱৰ বাবে বহু দূৰ অতিক্ৰম কৰি ৰাইজে সেই খণ্ডলৈ আহিবলগীয়া হয় (Amethi constituency burdened with various problems ) ।
কৃষকসকলৰ অভিযোগ বিভিন্ন সময়ত সাৰ অবিহনে তেওঁলোকে ঘৰলৈ উভতিবলগীয়াও হয় । সেয়ে কৃষক ৰাইজৰ দাবী যাতে সমষ্টিটোত সাৰ কেন্দ্ৰৰ সংখ্যা বৃদ্ধি কৰে । ইফালে একাংশ কৃষকে আকৌ অধিক মূল্যত দোকানৰ পৰা সাৰ ক্ৰয় কৰিবলগীয়া হয় । সমষ্টিটোৰ কৃষকৰ অভিযোগ বহু সময়ত সাৰৰ বাবে কৃষকসকলে ইজনে সিজনৰ লগত কাজিয়া কৰিবলগীয়াও হয় ।
সাধাৰণতে, সাৰৰ চৰকাৰী মূল্য প্ৰতি ৪৫ কিলোগ্ৰামৰ বেগত ২৭০ টকা, আনহাতে একেটা সাৰ দোকানত ৪১০ টকাত ক্ৰয় কৰিব লাগে । কৃষকসকলৰ অভিযোগ তেওঁলোকে সঞ্চয় কৰাটো দূৰৰে কথা খাবলৈও চিন্তা কৰিবলগীয়া হৈছে । সেয়ে এতিয়া কৃষি কৰ্ম কৰা বন্ধ কৰাৰ উপক্ৰম হৈছে সমষ্টিটোৰ কৃষকসকলৰ বাবে । ইফালে পথৰ গৰু, বনৰীয়া গাহৰি আদিৰ উপদ্ৰৱৰ বাবে বহু কৃষকে বুট,মটৰ আদিৰ খেতি কৰিবলৈও এৰিছে ।
মুঠতে কৃষি প্ৰধান সমষ্টিটোত চৰকাৰী সাৰৰ নাটনি, বনৰীয়া জন্তুৰ উপদ্ৰৱ, অনিয়মীয়া বিদ্যুতৰ যোগানকে ধৰি বহু সমস্যা আছে । সেয়ে সমস্যাসমূহ সমাধানৰ বাবে নিৰ্বাচনৰ পূৰ্বে প্ৰতিটো ৰাজনৈতিক দলে বিভিন্ন ধৰণৰ প্ৰতিশ্ৰুতি দিয়া দেখা গৈছে । অৱশ্যে কৃষক সমাজে কাৰ পক্ষত ভোট প্ৰদান কৰে সেয়াহে সময়ত দেখা যাব ।
লগতে পঢ়ক :UP Election 2022 : চতুৰ্থ পৰ্যায়ৰ নিৰ্বাচনৰ সময়তে 6 কোটি মূল্যৰ নগদ ধন জব্দ
