নেশ্যনেল ডেস্ক,২৪ নৱেম্বৰ : কেৰালাৰ কোচি আন্তঃৰাষ্ট্ৰীয় বিমানবন্দৰত দুই বিমান যাত্ৰীক গ্ৰেপ্তাৰ । অভিযোগ অনুসৰি বৃহস্পতিবাৰে নিশা উৰন্ত অৱস্থাত বিমানৰ আপদকালীন দুৱাৰ খোলাৰ চেষ্টা কৰিছিল যাত্ৰীকেইজনে । বেংগালুৰুলৈ গৈ থকা এলায়েন্স এয়াৰ ফ্লাইটত আছিল যাত্ৰী দুজন । ধৃত যাত্ৰীসকলক কৰ্ণাটকৰ বাসিন্দা ৰামোজী কোৰাইল আৰু ৰমেশ কুমাৰ বুলি চিনাক্ত কৰা হৈছে ।
এগৰাকী বিষয়াই কোৱা মতে দুজন যাত্ৰীৰ সন্দেহজনক কাৰ্যকলাপ লক্ষ্য কৰাৰ পাছতে বিমানখনৰ কৰ্মীসকলে তেওঁলোকক কৰায়ত্ত কৰিছিল । বিষয়াগৰাকীৰ মতে যাত্ৰী দুজনে কেইবাবাৰো আপদকালীন দুৱাৰ খন খুলিবলৈ চেষ্টা কৰিছিল । বিমানৰ কৰ্মচাৰীসকলে যাত্ৰীকেইজনক বিমানবন্দৰ কৰ্তৃপক্ষক গতাই দিয়ে ।
কোচি আন্তঃৰাষ্ট্ৰীয় বিমানবন্দৰত বিমানখন অৱতৰণ কৰাৰ লগে লগে বিমানবন্দৰৰ বিষয়াসকলে আৰক্ষী থানাত দাখিল কৰা অভিযোগৰ ভিত্তিত নেদুম্বাছেৰী আৰক্ষীয়ে যাত্ৰী দুজনক গ্ৰেপ্তাৰ কৰে । ইফালে দুয়োজন অভিযুক্ত যাত্ৰীকে সুৰক্ষাৰ স্বাৰ্থত বেংগালুৰুলৈ তেওঁলোকৰ প্ৰস্তাৱিত যাত্ৰা নিষিদ্ধ কৰা হৈছে ।
ইফালে যাত্ৰী দুজনে আৰক্ষীক কৈছে যে তেওঁলোকে ভুলবশতঃ আপদকালীন দুৱাৰখন খুলিবলৈ চেষ্টা কৰিছিল । আৰক্ষীয়ে তেওঁলোকক জেৰা অব্যাহত ৰাখিছে । সূত্ৰৰ মতে যাত্ৰীকেইজনে বিমানখনৰ আপদকালীন দুৱাৰ খোলাৰ চেষ্টা কৰাৰ সময়ত বিমান কৰ্মীয়ে তেওঁলোকক বাধা দিছিল । কিন্তু তেওঁলোকে কেইবাবাৰো দুৱাৰখন খুলিবলৈ চেষ্টা কৰিছিল । যাৰ বাবে বিমানখনৰ বাকী যাত্ৰীসকলো আতংকিত হৈ পৰিছিল । অৱশ্যে সঠিক সময়ত বিমান কৰ্মচাৰীসকলে লোৱা সিদ্ধান্তৰ বাবে কোনো ভয়ংকৰ দুৰ্ঘটনাৰ পৰা ৰক্ষা পৰে বিমানখন । ইয়াৰ বাবে যাত্ৰীসকলে বিমান কৰ্মীসকলক প্ৰশংসাও কৰিছে ।
লগতে পঢ়ক :৪৮ ঘণ্টাৰ ভিতৰত মুম্বাই বিমানবন্দৰ বোমাৰে উৰুৱাই দিয়াৰ ভাবুকি !
