নেশ্যনেল ডেস্ক, ১২ মে': ত্ৰিপুৰাত সংঘটিত হৈছে এক চাঞ্চল্যকৰ হত্যাকাণ্ড । ৰাজ্যখনৰ কালামকৌৰা আৰক্ষী থানাৰ অন্তৰ্গত বেলুয়াৰচাৰ বজাৰত বিশ্বজিৎ সৰকাৰ (২৫) নামৰ এজন যুৱকক আক্ৰমণকাৰীৰ এটা দলে নিৰ্মমভাৱে প্ৰহাৰ কৰাৰ ফলত মৃত্যু হয় যুৱকজনৰ । অৰ্জুন সৰকাৰ নামৰ এজন যুৱকৰ নেতৃত্বত আক্ৰমণকাৰীৰ দলৰ প্ৰহাৰত মৃত্যুক আঁকোৱালি লয় বিশ্বজিৎ সৰকাৰে ।
এই ঘটনাৰ পাচতে বিশ্বজিতৰ পৰিয়ালে আৰক্ষীৰ কাষ চাপে যদিও আৰক্ষীয়ে কোনোধৰণৰ ভূমিকা গ্ৰহণ কৰা নকৰে । আৰক্ষীৰ এই নিৰ্লিপ্ত ভূমিকাত ক্ষুদ্ধ হৈ পৰে পৰিয়ালৰ লগতে ৰাইজ । অৱশ্যে, পৰৱৰ্তী সময়ত আৰক্ষীয়ে পৰিয়ালৰ লোকৰ এজাহাৰৰ ভিত্তিত মূল অভিযুক্তক গ্ৰেপ্তাৰ কৰে । দোষীক উপযুক্ত শাস্তি প্ৰদান কৰিবলৈ দাবী জনায় ক্ষোভিত ৰাইজে ।
স্থানীয় ৰাইজে জনোৱা অনুসৰি, বিশ্বজিৎ সৰকাৰে অভিযুক্ত অৰ্জুন সৰকাৰক যোৱা ১৩ এপ্ৰিলত ভূলৱশতঃ মটৰচাইকেল চলাই থকা অৱস্থাত প্ৰত্যাহ্বান জনাইছিল যাৰ ফলত অৰ্জুনে এই জঘন্য ঘটনা সংঘটিত কৰে । আনকি বিশ্বজিতে প্ৰত্যাহ্বান জনোৱাৰ বাবে ক্ষমাও বিচাৰিছিল কিন্তু অৰ্জুনে ইমানতে ক্ষান্ত নাথাকি ক্ষোভিত হৈ উপৰ্যুপৰি প্ৰহাৰ কৰে । দুৰ্বৃত্তৰ প্ৰহাৰত গুৰুতৰভাৱে আঘাতপ্ৰাপ্ত বিশ্বজিতক উন্নত চিকিৎসাৰ বাবে ততাতৈয়াকৈ ত্ৰিপুৰা চিকিৎসা মহাবিদ্যালয় আৰু পৰৱৰ্তী সময়ত জিবিপি চিকিৎসালয়লৈ লৈ প্ৰেৰণ কৰা হৈছিল ।
প্ৰায় এমাহ সময়চোৱা চিকিৎসালয়ত চিকিৎসাধীন হৈ থকাৰ পিছত ঘৰলৈ উভতি অহাৰ কেইদিনমানৰ পাচতে তেওঁ অসুস্থ হৈ পৰিছিল । পাচত চিকিৎসকসকলৰ পৰামৰ্শ অনুসৰি বিশ্বজিতক পুনৰ আইএলএছ চিকিৎসালয় আগৰতলালৈ স্থানান্তৰ কৰা হৈছিল । অৱশেষত সোমবাৰে মৃত্যুৰে মানে বিশ্বজিতে ।
লগতে পঢ়ক: ত্ৰিপুৰাৰ শান্তিৰ বজাৰত বাওঁমৰ্চাৰ প্ৰতিনিধিৰ দলক আক্ৰমণ
