আগৰতলা,৩ ছেপ্তেম্বৰ : ত্ৰিপুৰাত পুনৰ তৃণমূল কংগ্ৰেছৰ কৰ্মীক আক্ৰমণ । ত্ৰিপুৰাত যেতিয়াৰে পৰা তৃণমূল কংগ্ৰেছে নিজৰ স্থিতি স্থাপনৰ বাবে চেষ্টা অব্যাহত ৰাখিছে । তেতিয়াৰে পৰা দেখা গৈছে তৃণমূলৰ কৰ্মীসকল আক্ৰমণৰ বলি হ'ব ধৰিছে । প্ৰতিবাৰেই বিজেপি কৰ্মীয়ে আক্ৰমণ কৰাৰ অভিযোগ উত্থাপন হয় ।
তৃণমূলৰ শীৰ্ষ নেতৃত্ব ত্ৰিপুৰাত উপস্থিত হোৱাৰ সময়তে এই ধৰণৰ হিংসাত্মক আক্ৰমণৰ ঘটনা সংঘটিত হোৱা দেখা যায় । এইবাৰ তৃণমূলৰ নেত্ৰী সুস্মিতা দেৱ (Sushmita Dev) ত্ৰিপুৰাত উপস্থিত হোৱাৰ পাছতে পুনৰ তৃণমূলৰ কৰ্মীক আক্ৰমণ কৰে দুৰ্বৃত্তই । ত্ৰিপুৰেশ্বৰী মন্দিৰ (Tripureswari temple) দৰ্শনৰ বাবে গৈছিল সুস্মিতা দেৱ ।
সুস্মিতা দেৱৰ লগত যোৱা দুই সমৰ্থকক আক্ৰমণ কৰে কোনো দুবৃত্তই । তৃণমূল কংগ্ৰেছে অভিযোগ কৰা মতে এই আক্ৰমণ বিজেপিয়ে কৰিছে । বৃহস্পতিবাৰে নিশা আঘাতপ্ৰাপ্ত সমৰ্থক দুগৰাকীক আগৰতলাৰ জিবিপি চিকিৎসালয়ত ভৰ্তি কৰোৱা হয় ।
ঘটনাৰ পাছতে হাস্পতালত উপস্থিত হয় সুস্মিতা দেৱ আৰু তৃণমূলৰ নেতা ব্ৰত্য বসুসহ কেইবাগৰাকী নেতা কৰ্মী । তৃণমূল নেতা তথা পশ্চিম বংগৰ শিক্ষা মন্ত্ৰী ব্ৰত্য বসুৱে (Bratya Basu) এই ঘটনাক তীব্ৰ ভাষাৰে গৰিহণা দিয়ে । তেওঁ কয় যে মন্দিৰ দৰ্শনৰ বাবে যোৱা সমৰ্থকক আক্ৰমণ কৰিছে বিজেপিৰ কৰ্মীয়ে ।
তেওঁৰ মতে পশ্চিমবংগতো ৰাজনৈতিক হিংসাৰ ঘটনা সংঘটিত হয় কিন্তু ত্ৰিপুৰাৰ এই ঘটনা সম্পূৰ্ণ বেলেগ । বসুৱে জনোৱা মতে আঘাতপ্ৰাপ্ত সমৰ্থক দুজনৰ চিকিৎসা চলি আছে । কিন্তু বিজেপিয়ে এই ধৰণৰ গুণ্ডামি বন্ধ কৰিব লাগিব বুলিও দাবী তোলে পশ্চিমবংগৰ শিক্ষামন্ত্ৰী তথা তৃণমূলৰ নেতাগৰাকীয়ে ।
লগতে পঢ়ক :ভাৰতীয় ৰাজনীতিৰ চাণক্য প্ৰশান্ত কিশোৰক কংগ্ৰেছত যোগদান কৰিবলৈ আহ্বান
