নিউজ ডেস্ক, 13 নৱেম্বৰ : আগন্তুক তেলেংগানা নিৰ্বাচনৰ বাবে জুবিলী হিলছ সমষ্টিৰ পৰা কংগ্ৰেছৰ টিকটত প্ৰতিদ্বন্দ্বিতা কৰা ভাৰতীয় ক্ৰিকেট দলৰ প্ৰাক্তন অধিনায়ক মহম্মদ আজহাৰুদ্দিনে নিজৰ গৃহ চহৰত জয়ৰ বাবে আত্মবিশ্বাসী ৷ কাৰণ তেওঁৰ মতে শাসকীয় বি আৰ এছে পৰিচিত অঞ্চলটোত “শূন্য উন্নয়ন” পৰিচালনা কৰিছে ৷
ইটিভি ভাৰতৰ সৈতে হোৱা এক আছুতীয়া সাক্ষাৎকাৰত আজহাৰুদ্দিনে কয় যে সমষ্টিটোৰ অৱস্থা দেখি তেওঁ বিচলিত হৈ পৰিছে ৷ "এইটো জুবিলী হিলছ সমষ্টি, নামটো বহুত ডাঙৰ ৷ জুবিলী হিলছ বুলি ক'লে সকলোৱে ভাবে যে ইয়াত কোটিপতিসকলে বাস কৰে, কিন্তু সমষ্টিটো যিখন ৰাজ্যত আছে চাওকচোন ৷ মই ইয়ালৈ যেতিয়া প্ৰথম আহিছিলো তেতিয়া মই বহুত বিচলিত হৈছিলো ৷ কিন্তু মই ভাবো সময়ৰ লগে লগে আমি ইয়াক বিকশিত কৰিম...বিধায়ক হ’ম আৰু সমষ্টিটোৰ উন্নয়ন কৰিম ৷” আজহাৰুদ্দিনে কয় ৷
60 বছৰীয়া প্ৰাক্তন সাংসদগৰাকীৰ মন্তব্যত খেলপথাৰত তেওঁৰ দিনবোৰৰ দৰে আত্মবিশ্বাস আৰু আগ্ৰহৰ প্ৰতিধ্বনিত হয় যদিও তেলেংগানাত 30 নৱেম্বৰত অনুষ্ঠিত হ’বলগা নিৰ্বাচনত সমষ্টিটোত বহুকোণীয়া প্ৰতিযোগিতাত তেওঁ নিজকে এক জটিল উইকেটত পাব পাৰে ৷ শাসনাধীষ্ঠ বিআৰএছে পুনৰ মাগন্তী গোপীনাথক প্ৰাৰ্থিত্ব প্ৰদান কৰিছে, যি একেৰাহে তৃতীয়বাৰৰ বাবে জয়লাভ কৰিবলৈ ইচ্ছুক ৷ বিজেপিয়ে প্ৰাৰ্থী হিচাপে ঘোষণা কৰিছে এল দীপক ৰেড্ডীক ৷ বি আৰ এছৰ লাভৰ বাবে মুছলমানৰ ভোট বিভাজন কৰাৰ প্ৰয়াস হিচাপে গণ্য কৰা মহম্মদ ৰাছেদ ফৰাজুদ্দিনক আই আই এম আই এমে প্ৰাৰ্থীৰূপে প্ৰক্ষেপ কৰিছে ৷
আজহাৰুদ্দিনে সাধাৰণ ৰাইজৰ বাবে উন্নয়নৰ প্ৰতিশ্ৰুতি দিয়ে, তেওঁ আত্মবিশ্বাসী যে বিজয়ী হিচাপে আত্মপ্ৰকাশ কৰিব ৷ "মই (জয়ৰ ওপৰত) বহুত আত্মবিশ্বাসী ৷ আচলতে মোৰ বাবে এইখন নতুন মেচ নহয়...আগতেও দুবাৰমান নিৰ্বাচনত যুঁজিছো ৷ কিন্তু মই ভাবো এই (নিৰ্বাচন) বেলেগ কাৰণ ই মোৰ গৃহ চহৰ ৷ মানুহে মোক ইয়াত ভাল পায় ৷ জুবিলী হিলছৰ জনসাধাৰণৰ পৰা যি সঁহাৰি পাইছো সেয়া অসাধাৰণ | মোৰ সমষ্টিটো অসাধাৰণ, মানুহবোৰ বৰ ভাল...তেওঁলোকে কামটো সম্পন্ন হোৱাটো বিচাৰে ৷" 1992, 1996 আৰু 1999 চনৰ এদিনীয়া বিশ্বকাপত ভাৰতক নেতৃত্ব দিয়া আজহাৰুদ্দিনে এইদৰে কয় ৷
2009 চনত জয়লাভ কৰাৰ পিছত উত্তৰ প্ৰদেশৰ মোৰাদাবাদৰ পৰা সংসদ সদস্য হিচাপে কৰ্মৰত ভাৰতৰ প্ৰাক্তন অধিনায়কগৰাকীয়ে সোমবাৰে মধ্য হায়দৰাবাদৰ ইউছুফগুডাত নাগৰিকৰ পৰা ভোট বিচাৰি প্ৰচাৰ অভিযানৰ পথত আগবাঢ়িছিল ৷ তেলেংগানাত কংগ্ৰেছ ক্ষমতালৈ আহিব নেকি বুলি সোধাত তেওঁ কয় "হয় নিশ্চিতভাৱে!" আৰু যোৱা 9 বছৰত কোনো উন্নয়নমূলক কাম নকৰিলে বুলি তেলেংগানাৰ মুখ্যমন্ত্ৰী কে চন্দ্ৰশেখৰ ৰাও আৰু বি আৰ এছক কটাক্ষ কৰে তেওঁ ৷
আজহাৰুদ্দিনে কয়, "যোৱা 9 বছৰ ধৰি কোনো উন্নয়নৰ কাম হোৱা নাই ৷ আপুনি কয় 'বাংগাৰু' তেলেংগানা (গোল্ডেন তেলেংগানা), কিন্তু আচলতে যদি আপুনি চায় তেন্তে বাংগাৰু তেলেংগানা নাই ৷"
প্ৰথম শ্ৰেণীৰ 15,855 ৰাণ থকা আজহাৰুদ্দিনৰ মতে জুবলী হিলছত শূন্য উন্নয়ন হৈছে ৷"মোৰ বাবে উন্নয়ন হৈছে দুখীয়া মানুহৰ উন্নয়ন কৰা ৷ উন্নয়ন হৈছে ডাঙৰ অট্টালিকা নিৰ্মাণ কৰি ডাঙৰ মানুহ অনা নহয় ৷ কোনো চাকৰি নাই ৷ ইয়াত বাস কৰা মানুহখিনিৰ যদি আপুনি উন্নয়ন নকৰে তেন্তে উন্নয়ন নহয় ৷" তেওঁ কয় ৷
"ৰাজনৈতিক জয় সদায় মধুৰ...ভাৰতীয় দলত সোমাবলৈ খেলি থাকোঁতে মোৰ প্ৰায় 12 বছৰ সময় লাগিছিল ৷ কিন্তু সাংসদ হ'বলৈ মোৰ মাত্ৰ এমাহ সময় লাগিছিল আৰু এতিয়া ইয়াতো, বিধায়ক হ'বলৈ আশাকৰোঁ ৷ ৰাজনীতিত আমি পোৱা ফলাফল অতি ক্ষীপ্ৰ ৷" আজহাৰুদ্দিনে কয় |
টিম ইণ্ডিয়াৰ অসাধাৰণ ক্ৰিকেট বিশ্বকাপ অভিযানৰ বিষয়ে সোধাত ক্ৰিকেটাৰ-ৰাজনীতিবিদগৰাকীয়ে কয় যে মেন ইন ব্লু দলে ভাল কম্বিনেচনৰ সৈতে খেলি থকাৰ বাবে এই আকাংক্ষিত ট্ৰফী লাভ কৰাৰ এক বৃহৎ সুযোগ আছে ৷ "তেওঁলোকৰ বেটিং ভাল, ফিল্ডিং ভাল আৰু বলিং ভাল ৷ সকলো বিভাগ ছিংকত আছে ৷"
30 নৱেম্বৰত তেলেংগানাত 119খন আসনৰ বাবে ভোটগ্ৰহণ অনুষ্ঠিত হ’ব ৷ কংগ্ৰেছে 117খন আসনত প্ৰতিদ্বন্দ্বিতা কৰাৰ বিপৰীতে মিত্ৰদল চিপিআইয়ে দুখন আসনত প্ৰাৰ্থী প্ৰক্ষেপ কৰিছে ৷
লগতে পঢ়ক : Meitei extremist organisations: পাঁচ বছৰলৈ বে-আইনী ঘোষণা কেইবাটাও মেইটেই সংগঠনক
