নেচনেল ডেস্ক, 7 এপ্ৰিল: ছাওলা ধৰ্ষণৰ গোচৰৰ ১০ বছৰ অতিক্ৰম কৰাৰ (10 years of Chhawla Rape case) পিছত উচ্চতম ন্যায়ালয়ে তিনিজন দোষীৰ শাস্তিৰ বিষয়ত নিজৰ ৰায়দান এতিয়াও স্থগিত কৰি ৰাখিছে । এগৰাকী ১৯ বছৰীয়া যুৱতীক ধৰ্ষণ আৰু হত্যাৰ অভিযোগত দোষী সাব্যস্ত হোৱাৰ পিছত দিল্লীৰ আদালতে তিনি অভিযুক্তক মৃত্যুদণ্ড প্ৰদান কৰিছিল । য'ত অভিযুক্তকেইজনে আনকি ভুক্তভোগীক ধৰ্ষণ কৰাৰ পিছত চকুত এচিড নিক্ষেপ কৰাৰো অভিযোগ আছে ।
এই ঘটনাটো ২০১২ চনত সংঘটিত হৈছিল । এই সন্দৰ্ভত উচ্চতম ন্যায়ালয়ৰ অতিৰিক্ত ছলিচিটৰ জেনেৰেল ঐশ্বৰ্য ভাটিয়ে গোচৰটোৰ তিনিজন দোষীৰ মৃত্যুদণ্ড বিচাৰি কৈছিল যে এনেবোৰ ঘটনাই সমাজত পিতৃ-মাতৃৰ মন ভাঙি দিয়ে ৷
উল্লেখ্য যে, যোৱা 10 বছৰ ধৰি, ছোৱালীগৰাকীৰ দৰিদ্ৰ পিতৃ-মাতৃয়ে এনে প্ৰতিটো স্থানলৈ গৈছে য'ৰ পৰা তেওঁলোকে ন্যায়ৰ আশা দেখিছে । এনে পৰিস্থিতিত আজি উচ্চতম ন্যায়ালয়ে বিষয়টো শুনি নিজৰ ৰায় সংৰক্ষিত ৰাখিছে ৷
উত্তৰাখণ্ডৰ পৰ্বতমালাৰ পৰা ভুক্তভোগীৰ পৰিয়ালটো দিল্লীলৈ গৈ থিতাপি লৈছিল যাতে তেওঁলোকে নিজৰ সন্তানক ভালদৰে লালন-পালন কৰিব পাৰে আৰু সন্তানে পঢ়ি-শুনি নাম অৰ্জন কৰিব পাৰে, কিন্তু এই পৰিয়ালটোৰ ডাঙৰ জীয়েকৰ সৈতে দিল্লীত যি ঘটিছিল তাক শব্দত বৰ্ণনা কৰিব নোৱাৰি । ইয়াত আমি ভুক্তভোগীগৰাকীৰ নাম আৰু তেওঁৰ পৰিয়ালৰ তথ্য দিব নোৱাৰো, কিন্তু যি গৰাকী কন্যাৰ সৈতে এই ঘটনা সংঘটিত হৈছিল তেওঁক নিশ্চিতভাৱে উত্তৰাখণ্ডৰ নিৰ্ভয়া বুলি ক'ব পাৰি (#uttarakhandkinirbhaya) ।
উল্লেখ্য যে, ভুক্তভোগী গৰাকীয়ে তেওঁৰ ভাতৃৰ সঠিক লালন-পালন কৰিব বিচাৰিছিল বাবেই দিল্লীত পঢ়াৰ লগতে এটা চাকৰি কৰিবলৈ আৰম্ভ কৰিছিল । দেউতাকে এটা ব্যক্তিগত প্ৰতিষ্ঠানত সুৰক্ষা কৰ্মী হিচাপে কাম কৰি আছিল; কিন্তু 2012 চনৰ ফেব্ৰুৱাৰী মাহৰ এটা দিনত, এইগৰাকী 'নিৰ্ভয়া'ৰ সকলো সপোন চূৰ্ণ-বিচূৰ্ণ হৈ গৈছিল ।
ঘটনাৰ অভিযুক্তক উচ্চ ন্যায়ালয়ৰ পৰা ফাঁচীৰ নিৰ্দেশ দিয়া হৈছিল যদিও বিষয়টো বহু বছৰ ধৰি বিচাৰাধীন আছিল ৷ তথাপিও ভুক্তভোগীৰ পৰিয়ালটোৱে আইনীভাৱে যুঁজ অব্যাহত ৰাখিছিল । প্ৰায় তিনি বছৰৰ পিছত গোচৰটোত দিল্লী উচ্চ ন্যায়ালয়ৰ ৰায় আহিছিল, বিচাৰাধীন আদালত আৰু উচ্চ আদালতে তিনিজন দোষীক মৃত্যুদণ্ড প্ৰদান কৰিছিল ৷
ইয়াৰ পিছত পৰিয়ালটোৱে অনুভৱ কৰিছিল যে, তেওঁলোকৰ কন্যাই এতিয়া ন্যায় পাব । এই সময়ছোৱাত দিল্লী চৰকাৰে ভুক্তভোগীৰ পৰিয়ালটোক মাত্ৰ এক লাখ টকাৰ ক্ষতিপূৰণ দি সান্ত্বনা দিবলৈ চেষ্টা কৰিছিল ৷ এই সময়ছোৱাত দোষীয়ে ফাঁচীৰ বিৰুদ্ধে উচ্চতম ন্যায়ালয়ত আবেদন জনাইছিল ৷ ইয়াৰ পিছত ভুক্তভোগীৰ পৰিয়ালৰ ওচৰত উচ্চতম ন্যায়ালয়ত গোচৰটোৰ সৈতে দৃঢ়তাৰে যুঁজিব পৰা ধন নোহাৱা স্বত্তেও পৰিয়ালটোৱে এই যুঁজ অব্যাহত ৰাখিছে ।
লগতে পঢ়ক : ছয় বছৰত ৰাজ্যত সংঘটিত হৈছে ৬,১৯২ টা হত্যাকাণ্ড
