নিউজ ডেস্ক, 4 জুন: 1960 আৰু 70 ৰ দশকৰ জনপ্ৰিয় বলীউড আৰু মাৰাঠী অভিনেত্ৰী সুলোচনা লটকৰে দেওবাৰে শেষ নিশ্বাস ত্যাগ কৰে (Sulochana Latkar Passes Away At 94)৷ কেইবাখনো বলীউড চলচ্চিত্ৰত 'মাতৃ'ৰ চৰিত্ৰত অভিনয় কৰা অভিনেত্ৰী সুলোচনা বিগত কেইদিনমানৰ পৰা অসুস্থ হৈ আছিল ৷ তাৰ পিচতে তেওঁক চিকিৎসাৰ বাবে দাদৰৰ সুশ্ৰূষা চিকিৎসালয়ত ভৰ্তি কৰোৱা হৈছিল । তেওঁৰ উশাহ-নিশাহৰ সমস্যা আৰু বাৰ্ধক্যজনিত ৰোগৰ বাবে চিকিৎসালয়ত ভৰ্তি কৰোৱা হৈছিল (Veteran actress Sulochana Latkar death)।
দেওবাৰে বিয়লি খবৰ পোৱা অনুসৰি চিকিৎসাধীন অৱস্থাতেই বিয়লি 6.30 বজাত 94 বছৰীয়া অভিনেত্ৰীগৰাকীৰ মৃত্যু হয় ৷ জানিব পৰা অনুসৰি, অভিনেত্ৰী সুলোচনাৰ মৃতদেহ সোমবাৰে পুৱা প্ৰায় 11 বজাত প্ৰভা দেৱীৰ বাসগৃহলৈ লৈ যোৱা হ’ব য'ত সন্ধিয়া 5 বজাৰ ভিতৰত অভিনেত্ৰীগৰাকীৰ অন্তিম সংস্কাৰ কৰা হ’ব । তাৰ পৰৱৰ্তী সময়ত শিৱাজী পাৰ্কত অভিনেত্ৰীগৰাকীৰ অন্ত্যেষ্টিক্ৰিয়া সম্পন্ন কৰা হ’ব ।
1928 চনৰ 30 জুলাইত কৰ্ণাটকৰ খাদকলত সুলোচনা লটকৰৰ জন্ম হৈছিল ৷ সুলোচনাই মুখ্য অভিনেত্ৰীৰ পৰা বিভিন্ন চৰিত্ৰলৈকে প্ৰায় 50 খনতকৈও অধিক মাৰাঠী চলচ্চিত্ৰত অভিনয় কৰিছে । একে সময়তে, হিন্দী চলচ্চিত্ৰত সুলোচনাই 250 খনতকৈও অধিক হিন্দী চলচ্চিত্ৰত গুৰুত্বপূৰ্ণ চৰিত্ৰত অভিনয় কৰিছিল । এগৰাকী অভিনেত্ৰী হিচাপে, সুলোচনাই 40 দশকত মাৰাঠী চলচ্চিত্ৰত অভিনয়ৰ পৃথিৱীখনত খোজ পেলাইছিল, তেওঁ বহুতো হিট মাৰাঠী চলচ্চিত্ৰত অভিনয় কৰি মাৰাঠী ছৱিজগতত প্ৰভূত্ব বিস্তাৰ কৰিবলৈ সক্ষম হৈছিল ৷
হিন্দী চলচ্চিত্ৰত তেওঁৰ অভিনয় জীৱনৰ আৰম্ভণিতে সুলোচনাই কেইবাখনো ডাঙৰ চলচ্চিত্ৰত মুখ্য অভিনেত্ৰীৰ চৰিত্ৰত অভিনয় কৰিছিল, কিন্তু পৰৱৰ্তী সময়ত তেওঁ হিন্দী চলচ্চিত্ৰত 'মাতৃ'ৰ চৰিত্ৰত অভিনয় কৰা এগৰাকী অভিনেত্ৰী হিচাপে স্বীকৃতি লাভ কৰিছিল । সুলোচনাক বলীউডৰ মেগাষ্টাৰ অমিতাভ বচ্চন আৰু ধৰ্মেন্দ্ৰৰ অনস্ক্ৰীণ মাতৃ বুলিও কোৱা হৈছিল । তেওঁক দুয়োজন চুপাৰষ্টাৰৰ বহুতো চলচ্চিত্ৰত মাতৃৰ চৰিত্ৰত দেখা গৈছিল ।
অভিনেত্ৰীগৰাকীয়ে দিব্য আনন্দ, সুনীল দত্ত, ৰাজেশ খান্নাৰ মাতৃৰ অভিনয়ো কৰিছিল ৷ অভিনেত্ৰীগৰাকীয়ে এক সাক্ষাৎকাৰত উল্লেখ কৰিছিল যে তেওঁ এই তিনিগৰাকী নায়কৰ মাতৃৰ চৰিত্ৰত অভিনয় কৰিবলৈ ভাল পাইছিল ৷
লগতে পঢ়ক: SSR birth anniversary: আজি বলীউডৰ প্ৰয়াত অভিনেতা সুশান্ত সিং ৰাজপুতৰ জন্মদিন
