নেশ্যনেল ডেস্ক,২১ এপ্ৰিল : জম্মু-কাশ্মীৰৰ পুঞ্চত সেনাৰ বাহনত সন্ত্ৰাসবাদীৰ ভয়ংকৰ আক্ৰমণক লৈ দেশজুৰি তীব্ৰ প্ৰতিক্ৰিয়াৰ সৃষ্টি হৈছে (Soldiers killed in a terrorist attack)। ৫ গৰাকী কৈ জোৱান জীৱন্তে অগ্নিদগ্ধ হোৱাৰ ঘটনাই সকলোকে শোকস্তব্ধ কৰি তুলিছে । ইফালে এই ঘটনাক ভাৰতীয় সেনাইও সহজভাৱে ল'ব পৰা নাই । সন্ত্ৰাসবাদীৰ গ্ৰেণেড আক্ৰমণৰ সন্দেহ কৰি ইতিমধ্যে তীব্ৰ অভিযান আৰম্ভ কৰিছে ভাৰতীয় সেনাই ।
জম্মু-কাশ্মীৰৰ নিৰাপত্তা বাহিনীয়ে বাটা-ডোৰিয়া অঞ্চলত এক বৃহৎ তালাচী অভিযান আৰম্ভ কৰিছে (Search operation after 5 Army Jawans killed)। অঞ্চলটো ঘেৰাও কৰি ৰাখিছে সেনা বাহিনীয়ে । সমীপৰ অৰণ্যত সন্ত্ৰাসবাদী লুকাই থকাৰ সন্দেহ কৰি অভিযানত ড্ৰোণ আৰু স্নিফাৰ ড'গ ব্যৱহাৰ কৰা হৈছে ।
ঘটনাস্থলীত আৰক্ষীৰ বোমা বিশেষজ্ঞ দল আৰু বিশেষ অভিযান গোট (SOG) উপস্থিত হৈছে । সীমান্তৱৰ্তী জিলা ৰাজৌৰী আৰু পুঞ্চত সতৰ্কতা জাৰি কৰা হৈছে । ভীম্ৰ গালি-পুঞ্চ পথত যান-বাহন চলাচল বন্ধ কৰি দিয়া হৈছে । লোকসকলক মেন্ধাৰ হৈ পুঞ্চলৈ যাত্ৰা কৰিবলৈ পৰামৰ্শ দিয়া হৈছে । সূত্ৰই জনোৱা মতে এনআইএৰ এটা দলেও শীঘ্ৰেই ঘটনাস্থলী পৰিদৰ্শন কৰিব ।
উল্লেখ্য যে মে' মাহত ছাংহাই সহযোগিতা সংস্থাৰ বৈঠকৰ বাবে পাকিস্তানৰ বৈদেশিক মন্ত্ৰী বিলাৱাল ভুট্টো জাৰ্দাৰীয়ে গোৱা ভ্ৰমণ কৰিব । তাৰ প্ৰাকক্ষণত এই আক্ৰমণ সংঘটিত হোৱাক লৈ ব্যাপক চাঞ্চল্যৰ সৃষ্টি হৈছে । ইফালে, ভাৰতীয় সেনাইও শ্বহীদ জোৱানসকলক গভীৰ শ্ৰদ্ধাঞ্জলি জ্ঞাপন কৰিছে ।
