নিউজ ডেস্ক, 26 নৱেম্বৰঃ ভাৰতীয় ৰেলৱে' পৰা 14 গৰাকী অবৈধ বিদেশী নাগৰিকক কৰায়ত্ত কৰিবলৈ সক্ষম হৈছে ভাৰতীয় ৰেলৱে' আৰক্ষী ৷ উল্লেখযোগ্য যে, বিগত 24 নৱেম্বৰত আলিপুৰদুৱাৰস্থিত ৰেলৱে' সুৰক্ষা বাহিনীৰ আৰপিএফ সুৰক্ষা কন্ট্ৰ’ল কক্ষই নং 02501 আগৰতলা-নিউ দিল্লী স্পেচিয়েল ৰাজধানী এক্সপ্ৰেছৰ ডবা নং বি-10 ৰ পৰা কিছুসংখ্যক ৰেলযাত্ৰীয়ে দু-ব্যৱহাৰৰ বিষয়ে উক্ত ডবাটোতে থকা এজন সচেতন ৰেলযাত্ৰীয়ে সুৰক্ষা হেল্পলাইন নম্বৰ 182 যোগে অভিযোগ দিয়ে ৷ ইপিনে অভিযোগ লাভ কৰিয়েই আলিপুৰদুৱাৰৰ ৰেলৱে' সুৰক্ষা বাহিনীৰ আৰক্ষী বিষয়াই কাটিহাৰা ডিভিজনৰ অধীনৰ নিউ জলপাইগুড়িস্থিত তেওঁলোকৰ সহযোগী বিষয়াক ঘটনাটো অৱগত কৰে কিয়নো ৰেলখনৰ পৰৱৰ্তী ষ্টপেজ আছিল নিউ জলপাইগুড়ি ৷
আনহাতে, ৰেলখন জলপাইগুড়িত উপস্থিত হোৱাৰ লগে লগে ৰেলৱে' সুৰক্ষা বাহিনী আৰু জিআৰপিৰ বিষয়া আৰু কৰ্মচাৰীয়ে তৎপৰতাৰে অনুসন্ধান কৰে ৷ ৰেলখনৰ টিএছ বিষয়াই বদৰপুৰৰ পৰা উক্ত ৰেলখনত যাত্ৰা কৰা 14 গৰাকীকৈ ৰেলযাত্ৰীক ধৰা পেলাবলৈ সক্ষম হয় ৷ আটক কৰা লোক কেইগৰাকীৰ হাতত ভাৰতীয় নাগৰিকৰূপে চিনাকি দিবলৈ কোনো ধৰণৰ নথি-পত্ৰ হাতত নাছিল ৷ ইপিনে তেওঁলোকে ৰেলত যাত্ৰা কৰা টিকটসমূহ ভূৱা নামত প্ৰস্তুত কৰি ভ্ৰমণ কৰিছিল বুলি ৰেলৱে' আৰক্ষীয়ে উল্লেখ কৰে ৷
ইপিনে ৰেলৱে' আৰক্ষীয়ে আটাইকেইগৰাকী লোককে ৰেলৰ পৰা নমাই নিউ জলপাইগুড়ীস্থিত জিআৰপি থানালৈ নি সোধাপোছা অব্যাহত ৰখাৰ সময়তে তেওঁলোক বাংলাদেশৰ কক্স বাজাৰস্থিত শৰণাৰ্থী শিৱিৰৰ পৰা পলাই ভাৰতত প্ৰৱেশ কৰিছিল বুলি জনায় ৷ সম্প্ৰতি বিদেশী সংশোধন আইনৰ ধাৰা 14A ৰ অধীনত নং.244/20ত নিউ জলপাইগুড়িৰ জিআৰপিয়ে এটা গোচৰ ৰুজু কৰি তদন্ত অব্যাহত ৰাখিছে ৷ ৰেলৱে' আৰক্ষীয়ে কৰায়ত্ত কৰা ব্যক্তি কেইগৰাকী ৰোহিংগীয়া সম্প্ৰদায়ৰ বুলি ধাৰণা কৰিছে ৷ লগতে আটকাধীন ব্যক্তি কেইগৰাকীক 25 নৱেম্বৰত দণ্ডাধীশৰ ওচৰত হাজিৰ কৰোৱাৰ পিছতে ন্যায়িক জিম্মালৈ প্ৰেৰণ কৰিছে বুলি জানিব পৰা গৈছে ৷
লগতে পঢ়কঃ যোৰহাটত আৰক্ষীৰ জালত তথাকথিত সংগঠনৰ প্ৰবঞ্চক
