নিউজ ডেস্ক, 25 নৱেম্বৰ : ‘‘মহানায়ক লাচিত বৰফুকনৰ 400 বছৰীয়া জয়ন্তী উপলক্ষে দেশৰ ৰাজধানীলৈ অহা আৰু ইয়াত সমবেত হোৱা আপোনালোক সকলোকে মোৰ আন্তৰিক অভিবাদন আৰু সেৱা জনাইছো ৷’’ শুকুৰবাৰে নতুন দিল্লীৰ বিজ্ঞান ভৱনত এইদৰে অসমীয়াতে ভাষণ আৰম্ভ কৰিলে প্ৰধানমন্ত্ৰী নৰেন্দ্ৰ মোডীয়ে ৷
নতুন দিল্লীৰ বিজ্ঞান ভৱনত 23 নৱেম্বৰৰ পৰা উদযাপিত লাচিত বৰফুকনৰ 400 বছৰীয়া জন্ম জয়ন্তীৰ আজি সফল সামৰণি হয় (Lachit Divas at Bigyan Bhawan Delhi)৷ অন্তিম দিনৰ কাৰ্যসূচীত উপস্থিত থাকে প্ৰধানমন্ত্ৰী নৰেন্দ্ৰ মোডী ৷ প্ৰধানমন্ত্ৰীগৰাকীয়ে অসমীয়া ভাষাতে লাচিত দিৱসৰ কাৰ্যসূচীৰ উপস্থিত ৰাইজক অভিবাদন জনোৱাত উৎফুল্লিত হৈ পৰিল উপস্থিত সকলো ৷
অসমীয়াত অভিবাদন জনোৱাৰ পাছতে অসম মাতৃক সেৱা জনালে প্ৰধানমন্ত্ৰী নৰেন্দ্ৰ মোডীয়ে ৷ তেওঁ কয় যে, অসম মাতৃয়ে ভাৰতক লাচিত বৰফুকনৰ দৰে এজন অদম্য বীৰ দিলে ৷ সমগ্ৰ দেশতে বৃহস্পতিবাৰে লাচিত বৰফুকনৰ 400 বছৰীয়া জন্ম জয়ন্তী উদযাপন কৰা বুলি উল্লেখ কৰি তেওঁ কয় যে দিল্লীতো তিনিদিনীয়াকৈ বিশেষ কাৰ্যসূচী গ্ৰহণ কৰা হ’ল ৷ উক্ত কাৰ্যসূচীত অংশগ্ৰহণ কৰিবলৈ পাই নিজকে সৌভাগ্যৱান বুলিও ভাষণ প্ৰসংগত উল্লেখ কৰিলে প্ৰধানমন্ত্ৰীগৰাকীয়ে (PM Modi on Lachit Divas Program) ৷
এই পবিত্ৰ ক্ষণত অসমৰ জনগণৰ লগতে দেশৰ 130 কোটি জনতাক শুভাকামনা জনায় প্ৰধানমন্ত্ৰী মোডীয়ে ৷ দেশে স্বাধীনতাৰ অমৃত মহোৎসৱ উদযাপন কৰি থকাৰ সময়তে লাচিত বৰফুকনৰ 400 বছৰীয়া জন্মজয়ন্তী উদযাপন কৰাৰ সৌভাগ্য হোৱা বুলি প্ৰধানমন্ত্ৰী মোডীয়ে উল্লেখ কৰে ৷ এয়া এক ঐতিহাসিক ক্ষণ বুলি উল্লেখ কৰে প্ৰধানমন্ত্ৰীগৰাকীয়ে ৷
আজি ভাৰতবৰ্ষই গোলামী কৰাৰ বিপৰীতে দেশৰ সাংস্কৃতিক ভিন্নতা উদযাপন কৰাৰ লগতে নিজৰ সংস্কৃতিৰ ঐতিহাসিক নায়ক-নায়িকাসকলক গৰ্বৰে স্মৰণ কৰিছে ৷ লাচিত বৰফুকন ভাৰত মাতাৰ অমৰ সন্তান ৷ এই সন্তানৰ সংকল্পক সাকাৰ ৰূপ দিবলৈ নিৰন্তৰ প্ৰয়াস কৰি থকা বুলি উল্লেখ কৰে প্ৰধানমন্ত্ৰী মোডীয়ে ৷
লাচিত বৰফুকনৰ জীৱনে আমাৰ আত্মসন্মান, পৰিচয়ৰ লগত চিনাকি কৰাই দিয়ে বুলি উল্লেখ কৰি প্ৰধান মন্ত্ৰী নৰেন্দ্ৰ মোডীয়ে কয় যে লাচিত বৰফুকনে দেশৰ প্ৰতি নিজকে সমৰ্পিত কৰিবলৈ শক্তি প্ৰদান কৰে ৷
প্ৰধানমন্ত্ৰীগৰাকীয়ে কয় যে মানৱ ইতিহাসৰ হাজাৰ বছৰত পৃথিৱীত বহুতো সভ্যতা আহিল আৰু গ’ল ৷ সময়ৰ সোঁতত বিলীন হৈ গ’ল বহু সভ্যতা ৷ কিন্তু এইখন আমাৰ মহান ভাৰত ৷ আমাৰ পূৰ্বপুৰুষে বহু সময়ত বিদেশী শত্ৰুৰ লগত সংঘৰ্ষ কৰি খেদি পঠিয়াইছিল ৷ তথাপি আজিও ভাৰত সেই একেই শক্তি, একেই সাংস্কৃতিক লৈ গৰ্বৰে জীয়াই আছে ৷ কাৰণ ভাৰতত যেতিয়াই কোনো সমস্যা হয়, তেতিয়া কোনো এজন মহান লোকৰ জন্ম হয় ৷
লাচিত বৰফুকন দেশৰ বীৰ যোদ্ধা আছিল বুলি উল্লেখ কৰি প্ৰধানমন্ত্ৰী মোডীয়ে কয় যে লাচিত বৰফুকনে(Veer Lachit Borphukan) দেখুৱাই দিলে যে ভাৰতৰ জীৱনজ্যোতি অমৰ হৈ ৰ’ব ৷ অসমৰ ইতিহাস ভাৰতীয় সংস্কৃতিৰ অন্যতম ঐতিহ্য ৷ উল্লেখ্যযোগ্য যে, লাচিত বৰফুকনৰ জীৱনভিত্তিত এক নাট্যৰূপ দি দেশৰ প্ৰতিটো প্ৰান্তলৈ লৈ যোৱাৰ পোষকতা কৰে প্ৰধানমন্ত্ৰীগৰাকীয়ে ৷
লগতে পঢ়ক : Amit Shah praises Lachit bravery : "বিকৃত ইতিহাসক শুদ্ধ ৰূপত লিখাত কোনেও বাধা দিব নোৱাৰে"
