নিউজ ডেস্ক, 14 ডিচেম্বৰ: অসদ্বাচৰণৰ বাবে 14 গৰাকী বিৰোধী সাংসদক বৃহস্পতিবাৰে লোকসভাৰ অধিৱেশনৰ পৰা নিলম্বন কৰা হৈছে ৷ অধিৱেশনৰ বাকী কালচোৱাত অংশগ্ৰহণ কৰিব নোৱাৰিব এই কেইগৰাকী সাংসদে ৷ বুধবাৰে লোকসভাৰ অধিৱেশন চলি থকাৰ সময়তে দুজন লোকে প্ৰবেশ কৰি অবাঞ্চিত পৰিস্থিতিৰ সৃষ্টি কৰা সন্দৰ্ভত ইণ্ডি মিত্ৰজোঁটৰ সাংসদে সদনৰ মজিয়াত কেন্দ্ৰীয় গৃহমন্ত্ৰী অমিত শ্বাহৰ বিস্তাৰিত বিৱৰণ দাবী কৰাৰ লগতে এই বিষয়তো আলোচনাৰ পোষকতা কৰিছিল ৷
বৃহস্পতিবাৰে বিভিন্ন দলৰ 14 জন বিৰোধী সাংসদক সদনৰ কাম-কাজত ব্যাঘাত জন্মোৱাৰ অভিযোগত শীতকালীন অধিৱেশনৰ বাকী সময়ছোৱাৰ বাবে লোকসভাৰ পৰা নিলম্বন কৰা হয় । নিলম্বনৰ পূৰ্বে বুধবাৰে সংঘটিত হোৱা নিৰাপত্তাৰ সুৰুঙা সন্দৰ্ভত চৰকাৰৰ পৰা বিবৃতি বিচাৰি সদনত শ্ল’গান দিয়ে সাংসদসকলে ।
নিলম্বিত লোকসভাৰ সাংসদসকলৰ ভিতৰত আছিল কংগ্ৰেছৰ 9 জন (ভি কে শ্ৰীকান্দন, বেনী বেহানন, মহম্মদ জাৱেদ, মণিকম ঠাকুৰ, টি এন প্ৰথাপন, হিবি ইডেন, জোতিমণি, ৰম্য হৰিদাস আৰু ডিন কুৰিয়াকোছে) , ডি এম কেৰ দুজন (কানিমোজি কৰুণানিধি, এছ আৰ পাৰ্থিবন) আৰু চি পি আই-এমৰ দুজন সাংসদ (পি আৰ নটৰাজন, এছ ভেংকটেছন) আৰু চি পি আইৰ এজন (কে. চুববাৰায়ন) ।
ৰাজ্যসভাৰ তৃণমূল কংগ্ৰেছৰ সাংসদ ডেৰেক অ’ব্ৰেইনেকো অধিৱেশনৰ বাকী অংশৰ বাবে নিলম্বন কৰা হয় ৷ অধ্যক্ষ জগদীপ ধনখৰে অনুশাসনমূলক ব্যৱস্থাৰ কাৰণ হিচাপে “অসৎ আচৰণ”ৰ কথা উল্লেখ কৰে ।
ভাৰতীয় কমিউনিষ্ট পাৰ্টিৰ জ্যেষ্ঠ নেতা বিনয় বিশ্বমে ইটিভি ভাৰতক জনোৱা মতে, কংগ্ৰেছৰ সভাপতি মল্লিকাৰ্জুন খাৰ্গেৰ চেম্বাৰত পুৱাৰ বৈঠকত চৰকাৰৰ ওপৰত বিশদ বক্তব্যৰ বাবে হেঁচা প্ৰয়োগ কৰাৰ সৰ্বসন্মতিক্ৰমে সিদ্ধান্ত লোৱা হৈছিল । এই বৈঠকত ইণ্ডি মিত্ৰজোঁটৰ প্ৰায় সকলো বিৰোধী নেতা উপস্থিত থাকে ।
কংগ্ৰেছৰ সাংসদ জয়ৰাম ৰমেশে X ত এটা পোষ্টত I.N.D.I.A. ব্লকে চৰকাৰৰ পৰা কি দাবী কৰিছিল সেই বিষয়ে তালিকাভুক্ত কৰিছে । "I.N.D.I.A. দলসমূহে দাবী কৰিছে :
1. উভয় সদনত গৃহমন্ত্ৰীৰ বিশদ বক্তব্য, বুধবাৰে লোকসভাত দেখা পোৱা অতি গুৰুতৰ আৰু চাঞ্চল্যকৰ নিৰাপত্তা ভংগৰ বিষয়ত আলোচনা ।
২) অনুপ্ৰৱেশকাৰীক ভিজিটৰ পাছ প্ৰদান কৰা বিজেপি সাংসদ প্ৰতাপ সিংহৰ বিৰুদ্ধে কঠোৰ ব্যৱস্থা । এই নিখুঁত বৈধ আৰু যুক্তিসংগত দাবীসমূহ মোডী চৰকাৰে মানি ল’বলৈ অস্বীকাৰ কৰাৰ বাবেই বৃহস্পতিবাৰে পুৱা লোকসভা আৰু ৰাজ্যসভা স্থগিত ৰখা হৈছে ।’’ এক্সত তেওঁৰ পোষ্টটো পঢ়িবলৈ পোৱা গৈছে ।
ইটিভি ভাৰতক তৃণমূল কংগ্ৰেছৰ সাংসদ ডোলা সেনে কয় যে অনুপ্ৰৱেশকাৰীক ভিজিটৰ পাছ প্ৰদান কৰা বিজেপি সাংসদ প্ৰতাপ সিংহক বহিষ্কাৰ কৰাটো তেওঁৰ দলে বিচাৰে । টিএমচিৰ ৰাজ্যসভাৰ সাংসদ সেনে কয় যে, ‘‘নিৰাপত্তা ভংগক লৈ গৃহমন্ত্ৰীৰ বিশদ বক্তব্যৰ উপৰিও আমি প্ৰতাপ সিংহক বহিষ্কাৰ কৰিবলৈও দাবী জনাইছো ৷’’
একেটা বিষয় উল্লেখ কৰি টিএমচিৰ লোকসভাৰ সাংসদ কাকলি ঘোষ দস্তীদাৰে কয় যে চৰকাৰে নিজৰ সাংসদে অনুপ্ৰৱেশকাৰীক ভ্ৰমণ পাছ দিয়াটো দেখা নাপায় । দস্তীদাৰে কয়, ‘‘বিৰোধী সাংসদৰ বিৰুদ্ধে ব্যৱস্থা ল’বলৈ বিজেপি চৰকাৰ সদায় সাজু, নিজৰ সাংসদৰ নাম এটা ডাঙৰ ঘটনাৰ সৈতে জড়িত হৈ থকাৰ সময়ত তেওঁলোক কিয় মৌন হৈ আছে ?’’
বিজেপি নেতৃত্বাধীন কেন্দ্ৰীয় চৰকাৰে জনসাধাৰণক নিৰাপত্তা প্ৰদানৰ ক্ষেত্ৰত একেবাৰে গুৰুত্ব নিদিয়ে বুলি অভিযোগ উত্থাপন কৰি দস্তীদাৰে কয়, ‘‘নিৰাপত্তা ভংগ বিষয়টোক লৈ আমি গৃহমন্ত্ৰী আৰু কেন্দ্ৰীয় চৰকাৰৰ পৰা বিবৃতি দাবী কৰি থাকিম ।’’
ৰাজ্যসভাৰ অধ্যক্ষ জগদীপ ধনখৰে টিএমচিৰ সাংসদ ডেৰেক অ’ব্ৰেইনক শীতকালীন অধিবেশনৰ বাকী অংশৰ পৰা নিলম্বন কৰাৰ নিৰ্দেশনাৰ বিষয়ে সোধাত কাকলিয়ে কয় যে “যন্ত্ৰই” দেখা নাপায় যে এজন সাংসদে চৰকাৰৰ বিৰুদ্ধে কোনো বিষয় উত্থাপন কৰিছে । ‘‘যেতিয়া আমি চৰকাৰৰ বিৰুদ্ধে যিকোনো বিষয় উত্থাপন কৰো তেতিয়া তেওঁলোকে আমাৰ লগত এনে ব্যৱহাৰ কৰে । এয়া তৃতীয়বাৰৰ বাবে এনে ব্যৱস্থা গ্ৰহণ কৰিলে অধ্যক্ষই ।’’ দস্তীদাৰে কয় । সদনত অসদ্বাচৰণৰ বাবে ৰাজ্যসভাৰ অধ্যক্ষ ধনখৰে টিএমচিৰ অ’ব্ৰেইনক নিলম্বন কৰে ।
লগতে পঢ়ক: সংসদৰ নিৰাপত্তা উলংঘনৰ সৈতে কংগ্ৰেছ জড়িত থকাৰ অভিযোগ বিজেপিৰ !
